ސޯޝަލް ހައުސިންގ ސްކީމްތަކުގެ ދަށުން ހުޅުމާލެ ފޭސް 1 އިން ދޫކޮށްފައިވާ ފްލެޓްތަކުގެ ކުލި ކުޑަކޮށްދެއްވާނެ ކަމުގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ. 

އެމަނިކުފާނު މިހެން ވިދާޅުވީ، މާލޭ ސިޓީގެ މޭޔަރުގެ މަޤާމަށް ސަރުކާރު ކޯލިޝަނުން ވާދަކުރައްވާ އައިޝަތު އާޒިމާ ޝަކޫރުގެ ވިލިމާލެ ކެމްޕޭން ޖަލްސާގައި ބައިވެރިވެވަޑައިގެން މިއަދު ދެއްކެވި ވާހަކަފުޅުގައެވެ.

ރައީސް ވިދާޅުވީ، ގާތްގަނޑަކަށް 4،000 ރ. އިން ފެށިގެން ގޮސް 7،000 ރ. އާ ހަމައަށް ނޫނީ 6،000 އަށް ވުރެ ގިނައިން މެއިންޓެނެންސް ފީ ހިމެނޭހެން ކުލިދައްކަންޖެހޭ ފޭސް 1 ގައި ހުރި ފްލެޓުތަކުގެ ކުލި ކުޑަކޮށްދެއްވާނެ ކަމަށެވެ.

މިގޮތުން ފްލެޓްތަކުގެ ކުލިން ވިހި އިންސައްތަ ކުޑަކޮށް ދެވޭނެ ކަމަށާއި، ފްލެޓްތަކަށް ނަގާފައިވާ ލޯނުތަކަށް ދައްކަންޖެހޭ އެފައިސާ މެނޭޖް ކުރާނީ ސަރުކާރުން ކަމުގައިވެސް އެމަނިކުފާނު ވިދާޅުވިއެވެ. އަދި އެކަމުގައި ރައްޔިތުން ކަންބޮޑުވާންޖެހޭނެ ކަމެއް ނޯންނާނެކަންވެސް އެމަނިކުފާނު ފާހަގަކުރެއްވިއެވެ.

މިދިޔަ މަހުގެ 5 ވަނަ ދުވަހު ރައީސުލްޖުމްހޫރިއްޔާ ވަނީ، ސަރުކާރުން ހިޔާ ފްލެޓްތަކުގެ ކުލި 3984އަށް ކުރިޔަށް އޮތް 7 އަހަރަށް ކުޑަކޮށްދެއްވާފައެވެ. އެހެންކަމުން މިއާއެކު ހިޔާ ފްލެޓްތަކުގެ މެއިންޓަނަންސް އާއެކު ކުލީގެ ގޮތުގައި، ދައްކަންޖެހޭނީ، 4984ރ އެވެ.