އަމީނީ މަގުގައި މިހާރު ނުނިމި އޮތް ސެގްމެންޓް 12، އަދި 13 ނިންމުމުގެ މަސައްކަތުގެ ތެރެއިން މިއަދު އެމަގުގައި ތާރު އަޅަން ފެށޭނެ ކަމަށް ކޮންސްޓްރަކްޝަން މިނިސްޓަރ ޑރ. ޢަބުދުﷲ މުައްޠަލިބު ވިދާޅުވެއްޖެއެވެ.

މިނިސްޓަރ މުއްޠަލިބު މިހެން ވިދާޅުވީ، އަމީނީ މަގުގެ މަސައްކަތް ކުރިޔަށްދާ ގޮތުގެ މައުލޫމާތު ހިއްސާކުރައްވައި އެކްސްގައި ކުރެއްވި ޕޯސްޓެއްގައެވެ.

އާރްޑީސީންވެސް ބުނެފައި ވަނީ، އަމީނީ މަގު ހެދުމުގެ މަސައްކަތުގެ ތެރެއިން މިއަދު ހެނދުނު ކުރިޔަށް ދިޔައީ، އަމީނީމަގުގައި އެމްސީ-30 (ބިޓުމެން ސްޕްރޭ) ޖެހުމުގެ މަސައްކަތް ކަމަށެވެ.

އަމީނީ މަގުގެ ނުނިމިއޮތް ބައިގެ ޢަމަލީ މަސައްކަތް ރޯޑް ކޯޕަރޭޝަނުން ފަށާފައި ވަނީ، 9 ޑިސެންބަރު 2023 ގައެވެ.

އަމީނީމަގު ޒަމާނީ ފެންވަރަށް ތަރައްޤީ ކުރުމުގެ މަސައްކަތް އާރްޑީސީއާ ހަވާލުކުރީ 84.4މިލިއަން ރުފިޔާއަށެވެ.