ރާއްޖޭގެ ކަނޑުގެ ސަރަހައްދުގައި ނުވަތަ ރާއްޖެއާ ކައިރީގައި ވެސް، އެއްވެސް ހަމަލާއެއް ދީފައި ނުވާކަމުގައި މޯލްޑިވްސް ނެޝަނަލް ޑިފެންސް ފޯސް އެމްއެންޑީއެފުން ބުނެފިއެވެ.

އެމްއެންޑީއެފުން ބުނީ، މިހާތަނަށް ބެލިބެލުމުން މިޚަބަރުގައިވާ ބަައެއް މަޢުލޫމާތާއި ފޮޓޯއަކީ މިީގެ ކުރިން ރާއްޖޭގެ ކަނޑުގެ ސަރަހައްދުންބޭރުން ވަރަށް ދުރުން ހިނގާފައިވާ ހާދިސާތަކުގެ މަޢުލޫމާތާއި ފޮޓޯކަން އެނގިފައިވާތީއާއި، މިފަދަ ކަމެއް ރާއްޖެއާއ ކައިރިން ހިންގިކަމުގެ އެއްވެސް އިޝާރާތެއް ފެންނަން ނެތުމާއި، މަޢުލޫމާތު ހިއްސާ ކުރާ ސަރަހައްދީ އިދާރާތަކަށްވެސް އެފަދަ ރިޕޯޓެއް ލިބިފައިވާކަމުގެ އެއްވެސް މަޢުލޫމާތެއް މިހާތަނަށް ލިބިފައިނުވާތީ، ދިވެހިރާއްޖޭގެ ކަނޑުގެ ސަރަހައްދެއްގައި ނުވަތަ ކަނޑުގެ ސަރަހައްދާއި ކައިރިން އެފަދަ ޙާދިސާއެއް ހިނގިކަމަށް ފަތުރާ ޚަބަރަކީ ޞައްޙަ ޚަބަރެއްކަމަށް ނުބެލެވޭ ކަމަށެވެ. އެހެން ނަމަވެސް އަދިވެސް އެކަން އިތުރަށް ބަލަމުން އަންނަ ކަމުގައިވެސް އެމްއެންޑީފުން ވަނީ ބުނެފައެވެ.

ޣައްޒާއާ ދެކޮޅަށް އިޒްރާއީލުން ފަށާފައިވާ ހަނގުރާމަ ހުއްޓުވުމަށާއި ފަލަސްޠީނުގެ ރައްޔިތުންނާއި އެއްބައިވުމުގެ ގޮތުން ޔަމަނުގެ ހޫތީން ދަނީ، ރަތްކަނޑުގެ ތެރެއިން އިޒްރޭލުގެ އީލާތު ބަނދަރަށް ދަތުރުކުރާ އުޅަނދުތަކަށް ހަމަލާދީ ހުއްޓުވަމުންނެވެ. އަދި އިޒްރޭލާއި ގުޅުންހުރި ކާގޯ ބޯޓުތަކާއި، ތެޔޮއުފުލާ ޓޭންކަރުތަކަށްވެސް ދަނީ ހަމަލާތައް ދެމުންނެވެ. މިގޮތުން އިންޑިއާކަނޑުގެ ސަރަހައްދުން ރާއްޖޭގެ ހުޅަނގު އުތުރުން ދަތުރުކުރަމުން ދިޔަ އިޒްރޭލުން ދެ ތެޔޮޓޭންކަރަކަށް ހޫތީން ޑްރޯން ހަމަލާތަކެއްދީފައިވާ ކަމަށް ބުނެ ވަނީ އަޑު ފަތުރާފައެވެ. އެ ދެއުޅަނދަށް ހޫތީން ހަމަލާދިން ނަމަވެސް އެ ދެއުޅަނދަށް ހަމަލާދީފައި ވަނީ ރާއްޖޭގެ ކަނޑުގެ ސަރަހައްދުގައި ނުވަތަ ރާއްޖޭގެ ކަނޑުގެ ސަރަހައްދާއި ކައިރި ހިސާބެއްގައިވެސް ނޫންކަން މިހާރު ވަނީ ހާމަވެފައެވެ.