މިއަހަރު ބާއްވާ ރައްޔިތުންގެ މަޖިލީހުގެ އިންތިޚާބުގައި ދަ ޑިމޮކްރެޓްސްގެ ޓިކެޓުގައި ވާދަކުރަން ބޭނުންވާ ފަރާތްތަކަށް ކުރިމަތިލުމުގެ ފުރުޞަތު ހުޅުވާލައިފިއެވެ.

ދަ ޑިމޮކްރެސްޓްސްގެ ޕްރައިމަރީގައި ވާދަކުރަން ބޭނުންވާ ފަރާތްތަކަށް 4 ފެބްރުއަރީ 2024 ވާ އާދީއްތަ ދުވަހުގެ ހަވީރު 4:00 އާ ހަމައަށް ފުރުޞަތު ވަނީ ހުޅުވާލާފައެވެ. އެ ޕާޓީގެ މަޖިލިސް ޕްރައިމަރީ ބާއްވަން ނިންމާފައިވަނީ 17 ފެބްރުއަރީގައެވެ.

އެ ޕާޓީން ނެރުނު ބަޔާނެއްގައި ބުނީ ޕްރައިމަރީގައި ވާދަކުރެވޭނީ 4 ފެބްރުއަރީ 2024 ވާ އާދީއްތަ ދުވަހުގެ ހަވީރު 4:00 އާ ހަމައަށް ޕާޓީގެ ދަފްތަރުގައި ޖެހިފައިވާ މެންބަރުންނަށް ކަމަށެވެ. ޕްރައިމަރީގައި ވޯޓު ދެވޭނީވެސް އެ މުއްދަތުގައި ދަފްތަރުގައި ޖެހިފައިވާ މެންބަރުންނަށް ކަމަށްވެސް ވަނީ ބުނެފައެވެ.

ދަ ޑިމޮކްރެޓްސް އިން ބުނި ގޮތުގައި އެ ޕާޓީގެ މަޖިލިސް އިންތިޚާބުގެ ޕްރައިމަރީގައި ވޯޓުލެވޭ މީހުންގެ ވަގުތީ ލިސްޓު 6 ފެބްރުއަރީގައި އާއްމު ކުރާނެއެވެ. އަދި ޝަކުވާތަކަށް ބެލުމަށްފަހު 11 ފެބްރުއަރީގައި ދާއިމީ ލިސްޓު އާއްމު ކުރާނެއެވެ.

ޕްރައިމްރީއަށް ކުރިމަތިލާ މެންބަރުންނަކީ ޤާނޫނުއަސާސީއާއި މަޖިލީހުގެ އިންތިޚާބުގެ ޤާނޫނުގައި ބަޔާންކޮށްފައިވާ ޝަރުތުތައް ފުރިހަމަވާ މީހަކަށް ވާން ޖެހޭނެ ކަމަށް ޑިމޮކްރެޓްސް އިން ބުނެއެވެ. ޕްރައިމަރީގައި ދާއިރާއަކަށް އެންމެ މެންބަރަކު ކުރިމަތިލައިފިނަމަ އެ މެންބަރަކަށް ޕްރައިމަރީއަކާ ނުލައި ޓިކެޓް ލިބޭނެކަމަށްވެސް ޑިމޮކްރެޓްސް އިން ބުންޏެވެ.