މޯލްޑިވްސް އިންޓަރނޭޝަނަލް ފައިނޭންޝަލް ސަރވިސަސް އޮތޯރިޓީގެ ނަމުގައި އާ އޮތޯރިޓީއެއް އުފެއްދުމަށް މަސައްކަތް ކުރައްވަމުންގެންދަވާ ކަމުގައި ރައީސުލްޖުމްހޫރިއްޔާ، ޑރ. މުޙައްމަދު މުޢިއްޒު ވިދާޅުވެއްޖެއެވެ.

އެމަނިކުފާނު މިހެން ވިދާޅުވީ، ވެލާނާ އިންޓަރނޭޝަނަލް އެއާޕޯޓާއި އިކޮނޮމިކް ޒޯން ތަރައްޤީކުރުމުގެ މަޝްރޫޢު އިފްތިތާޙްކުރެއްވުމުގެ ގޮތުން މިރޭ ދަރުބާރުގޭގައި ބޭއްވި ޖަލްސާގައި ދެއްކެވި ވާހަކަފުޅުގައެވެ.

ރައީސުލްޖުމްހޫރިއްޔާ ދެއްކެވި ވާހަކަފުޅުގައި ވިދާޅުވީ، މޯލްޑިވްސް އިންޓަރނޭޝަނަލް ފައިނޭންޝަލް ސަރވިސަސް އޮތޯރިޓީ ވެގެންދާނީ، އިންޓަރނޭޝަނަލް ފައިނޭންޝަލް ސެންޓަރުތައް ރާއްޖޭގައި ޤާއިމްކުރުމުގެ މަގު ފަހިކުރުމުގެ ގޮތުން މިވަގުތަށް އެޅޭ ފުރަތަމަ ފިޔަވަޅު ކަމުގައި ކަމަށެވެ. އަދި އެކަމާއި ގުޅިގެން ކުރަންޖެހޭ ހުރިހާ މަސައްކަތްތަކެއް މިހާރު ވަނީ ފެށިފައި ކަމަށާއި، އެމް.އެމް.އޭ. އާއި، ކަމާބެހޭ އެހެން ފަރާތްތަކާ ގުޅިގެން އެކަމުގެ މަސައްކަތްތައް ކުރެވެމުންދާކަމުގައިވެސް ރައީސުލްޖުމްހޫރިއްޔާ ވިދާޅުވިއެވެ.

އެމަނިކުފާނު އިތުރަށް ވިދާޅުވީ، އަންނަ އާދީއްތަ ދުވަހު އޮންނަ ކެބިނެޓް ބައްދަލުވުމުގައި މަޝްވަރާކޮށް "މޯލްޑިވްސް އިންޓަރނޭޝަނަލް ފައިނޭންޝަލް ސަރވިސަސް އޮތޯރިޓީ"ގެ ނަމުގައި އާ އޮތޯރިޓީއެއް ޤާއިމްކުރުމަށް ނިންމޭނެ ކަމަށެވެ.

ރާއްޖޭގެ އިޤުތިޞާދަށް ހެޔޮ ބަދަލުތައް ގެނައުމަށާއި، އިޤުތިޞާދު ފުޅާކޮށް ދައުލަތުގެ ފުދުންތެރިކަން އިތުރުކޮށް، ރައްޔިތުންނަށް ފާގަތިކަމާއި ތަނަވަސްކަން ހޯއްދަވައި ދެއްވުމަކީ ސަރުކާރުގެ މުހިއްމު އެއް އަމާޒުކަމުގައި ރައީސުލްޖުމްހޫރިއްޔާ ވަނީ، ރިޔާސީ އިންތިޚާބުގެ ކެމްޕޭންތަކުގެ ތެރޭގައި ވިދާޅުވެފައެވެ. މިގޮތުން އިޤުތިޞާދީ ބަދަލުތަކަށް މަގުފަހި ކުރުމުގެ ގޮތުން މުހިއްމު ކަންތައްތަކެއް ކުރުމަށް އަންގާރަ ދުވަހު ބޭއްވި ވަޒީރުންގެ މަޖިލީހުންވެސް ވަނީ ނިންމަވާފައެވެ.