ކުރީ ސަރުކާރުގެ ގެދޮރުވެރިޔާ ސްކީމްގެ ދަށުން އެފްޑީސީން އަޅަމުންދާ ފްލެޓްތަކުގެ ތެރެއިން ފުރަތަމަ 4000 ފްލެޓް ލިބިފައިވާ ފަރާތްތަކަށް ފްލެޓްތައް ހަވާލުކުރުމުގެ މަސައްކަތް ވަރަށް އަވަހަށް ފަށާނެ ކަމުގައި އެކުންފުނިން ބުނެފިއެވެ.

ފަހިދިރިއުޅުން ކޯޕަރޭޝަނުން މިއަދު އާއްމުކުރި ނޫސްބަޔާނެއްގައި ބުނެފައި ވަނީ، 4000 ހައުސިންގ ޔުނިޓްގެ މަސައްކަތް ޝެޑިއުލާއި އެއްގޮތަށް ކުރިޔަށް ދާކަމަށާއި އެންމެ ބާރަށް މަސައްކަތް ކުރިޔަށް ގޮސްފައި ވަނީ ހުސްވި ޑިސެމްބަރު މަހުގައި ކަމަށެވެ. މިގޮތުން ސްޓަރްކަްޗަރ ހަދަމުންދާ އިމާރާތްތަކުގެ 31 ޝީޓް ޑިސެމްބަރު މަހުގެ ތެރޭގައި އަޅައި ނިމިފައިވާ ކަމުގައި އެކުންފުނިންވަނީ ބުނެފައެވެ. 

އެފްޑީސީން ބުނީ ފްލެޓްތަކުގެ މަސައްކަތް 3 ޝިފްޓަކަށް ބަހާލައިގެން މެދުކެނޑުމެއް ނެތި 24 ގަޑިއިރު ކުރަމުންދާ ކަމަށެވެ. އަދި ފްލެޓްތައް ލިބިފައިވާ ފަރާތްތަކަށް ވީހާވެސް އަވަހަކަށް ފްލެޓްތައް ހަވާލުކުރުމުގެ ގޮތުން އެއްބަސްވުންތަަކުގައި ސޮއިކުރަން ފެށުމަށް މިހާރު ތައްޔާރުވަމުން އަންނަ ކަމުގައިވެސް އެކުންފުނިން ވަނީ ބުނެފައެވެ.

އެފްޑީސީން ހުޅުމާލެގައި 18 ބުރީގެ 32 ޓަވަރު އިމާރާތް ކުރާއިރު އޭގެ ތެރެއިން ބައެއް ޓަވަރުތައް މިހާރު ހުރީ މީހުންނަށް ވަދެވޭ ވަރަށް ނިމިފައެވެ. އެންމެ ފުރަތަމަ ނިމޭ 4000 ފްލެޓް ލިބޭ ފަރާތްތައް ކަނޑައެޅުމުގައި މައްސަލަތައް ހުރިކަމަށް ބުނެ އޭސީސީން ވަނީ އެމައްސަލަ ބަލަން ފަށާފައެވެ.  ހައުސިންގ މިނިސްޓަރ ޑރ. ޢަލީ ޙައިދަރު ވިދާޅުވެފައި ވަނީ ފްލެޓްތައް ހަވާލުކުރަން ފަށާނީ އޭސީސީން ފްލެޓްތަކާއި ގުޅޭ ގޮތުން ބަލަމުންދާ މައްސަލަތައް ނިމުމުން ކަމަށެވެ.