އެމްޑީޕީގެ ޓިކެޓްގައި ރައްޔިތުންގެ މަޖިލީހުގެ ކާށިދޫ ދާއިރާއަށް ވާދަކުރުމަށް ކުރިން ނިންމެވި ނަމަވެސް އަމާޒުވަމުން އަންނަ ފާޑިކިޔުންތަކުގެ ސަބަބުން ހިތަށް ކެތް ނުވާތީ މަޖިލީހަށް ކުރިމަތިލުމުގެ ޚިޔާލު ދޫކޮށްލައްވައިފި ކަމުގައި އަލްހާން ފަހުމީ ވިދާޅުވެއްޖެއެވެ.

އަލްހާން އެކްސްގައި ލިޔުއްވި ޕޯސްޓެއްގައި ވިދާޅުވީ، ރައްޔިތުންގެ މަޖްލިހުގެ ކާށިދޫ ދާއިރާގެ އެމްޑީޕީ ޓިކެޓަށް ވާދަކުރަން އަޅުގަނޑު ހުށަހަޅާ، އެކަން އިޢްލާންކުރުމުން ގިނަ މައްސަލަތަކާއި ކުރިމަތިލާންޖެހިފައިވާ ކަމަށެވެ. މިގޮތުން، އަލްހާންގެ ކުންފުނި ކިންގްސް ކެޕިޓަލް ހޯލްޑިންގްސް އާއި ކުރިމަތިވި މައްސަލަ އާއި ގުޅިގެން އެކުންފުންޏާއެކީ މުޢާމަލާތުކުރި ބައެއް ފަރާތްތަކަށް ދޭންޖެހޭ ފައިސާ ނުދެވި އޮތުމުގެ ސަބަބުން ، އޭގެ ތެރެއިން ބައެއް ފަރާތްތަކުން، އަލްހާން ރައްޔިތުންގެ މަޖްލިސް ގޮނޑިއަކަށް ކުރިމަތިލުމާމެދު ދަނީ ފާޑުކިޔަމުން ކަމުގައި އަލްހާން ވަނީ ބުނެފައެވެ.

އަލްހާން ވިދާޅުވީ، ކުންފުނީގެ މާލީ މުޢާމަލާތާއި ގުޅިގެން ކުންފުނިން އަދާކުރަންޖެހޭ ޒިންމާތައް ނުނިންމާ، މިފަދަ އިންތިޚާބެއްަަގައި ވާދަކުރުމަކީ އޭނާގެ ހިތަށް އެހާ ފަސޭހަ ކަމަކަށް ނުވިކަމަށެވެ. އެހެންވެ އެމްޑީޕީގެ ފަރާތުން ކާށިދޫ ދާއިރާގެ ރައްޔިތުންގެ މަޖިލީހުގެ ގޮނޑިއަށް ވާދަކުރުމަށް ނަންހުށައެޅި ހުށައެޅުން އަނބުރާ ގެނެސްފައިވާ ކަމުގައިވެސް އަލްހާން ވިދާޅުވިއެވެ.

އަލްހާނާއި އެކު ދެން އެދާއިރާގައި ވާދަކުރައްވާނެކަން އިޢުލާނު ކުރައްވާފައިވާ ބޭފުޅުންގެ ތެރޭގައި ރައްޔިތުންގެ މަޖިލީހުގެ ކާށިދޫ ދާއިރާގެ މިހާރުގެ މެމްބަރު، ޢަބުދުﷲ ޖާބިރު ހިމެނިވަޑަިއގަންނަވައެވެ. ރައްޔިތުންގެ މަޖްލިހުގެ ކާށިދޫ ދާއިރާ އެމްޑީޕީ ޕްރައިމަރީގައި ވާދަކުރަން ނިންމައި އަލްހާން ފޯމް ހުށައެޅުއްވީ ޑިސެމްބަރު 30 ގައެވެ. ފަސްދުވަސް ފަހުން ނަން އަނބުރާ ނެގީ އަލްހާން ވިދާޅުވެފައިވާ ގޮތުގައި ކުރިމަތިވެފައިވާ މައްސަލަތަކުގެ ސަބަބުން ހިތަށް ކެތްނުވެގެންނެވެ.