ވިލިމާލޭގެ މަގުތައް ތާރުއަޅައިގެން ޒަމާނީ ފެންވަރަށް ހެދުމަށްޓަކައި ކުރަންޖެހޭ، ސަރވޭތައް ކުރުމާއި މަގުތައް ޑިޒައިން ކުރުމުގެ މަސައްކަތް ރޯޑް ޑިވެލޮފްމެންޓް ކޯޕަރޭޝަން (އާރްޑީސީ)އާ ހަވާލުކޮށްފިއެވެ.

މިއެއްބަސްވުމުގައި ސޮއެކުރުމަށް ބޭއްވި ރަސްމިއްޔާތަށް ފަހުގައި ނޫސްވެރިންނަށް މައުލޫމާތު ދެއްވަމުން، ކޮންސްޓްރަކްޝަން މިނިސްޓަރ ޑރ. ޢަބުދުﷲ މުއްޠަލިބު ވިދާޅުވީ، ވިލިމާލޭގެ 5.6 ކިލޯމީޓަރުގެ މަގު ޒަމާނީ ފެންވަރަށް ހެދުމަށް ނިންމާފައިވާ ކަމަށެވެ. އަދި މިމަޝްރޫޢަށް ބޭނުންވާ ސަރވޭގައި ބަލާނީ މަގުތަކުގެ ހާލަތާއި، މަޝްރޫޢަށް ހިނގާނެ ޚަރަދުކަމުަގައިވެސް މިނިސްޓަރ ވިދާޅުވިއެވެ. އަދި މަގުތައް ފަރުމާކުރެވޭނީ، ޖުމުލަ ގޮތެއްގައި މަގުތަކުގައި މެދުވެރިވާ މައްސަލަތަކަށް ހައްލެ ހޯދޭނެ ގޮތަށް، ކަރަންޓާއި ފެނާއި ނަރުދަމާގެ ހޮޅިތަކާއި، ކޭބަލްތައް އެޅޭނެ ގޮތަށް ދެމެހެއްޓެނިވި ގޮތެއްގައިކަން މިނިސްޓަރ ފާހަގަކުރެއްވިއެވެ.

ވިލިމާލެގެ މަގުތަކުގެ ސަރވޭ މަސައްކަތާއި، ޑިޒައިން އަދި އީއައިއޭގެ  މަސައްކަތް އާރްޑީސީއާ ހަވާލުކޮށްފައި ވަނީ، 1.79 މިލިޔަން ރުފިޔާއަށް 120 ދުވަހުގެ ތެރޭގައި މަސައްކަތް ނިންމާ ގޮތަށެވެ.

ވިލިމާލެއަކީ މާލެއާ މުޅިން ވަކިން އޮންނަ ރަށަކަށް ވާއިރު، ވިލިމާލޭގައި އިންޖީނުލީ އެއްގަމު އުޅަނދުފަހަރު ދުއްވުމަކީ މަނާކަމެކެވެ. ޚާއްޞަ ހުއްދައެއް ދެވިފައިވާ އުޅަނދުތައް ފިޔަވައި ވިލިމާލޭގައި ދުއްވާ ހުރިހާ އުޅަނދެއްވެސް ވާންޖެހެނީ ފޮސިލްފިއުލް ބޭނުން ނުކުރާ އުޅަނދު ތަކަކަށެވެ.