އެފްއޭއެމްގެ ރައީސަކު އިންތިހާބު ކުރުމަށް ބާއްވަން އުޅޭ އިންތިހާބުގައި ވާދަކުރުމަށް ރައްޔިތުންގެ މަޖިލީހުގެ މަހިބަދޫ ދާއިރާގެ މެމްބަރު، އަހްމަދު ޠާރިގު (ޓޮމް)، ހުށަހަޅާފައިވާ ކްލަބް ވެލެންސިއާގެ ތާއީދު ސިޓީގައި ސޮއިކޮށްފައިވާ އެ ކްލަބުގެ ޗެއާމަން، އަބްދުﷲ އަޒްމީން، އިންތިއުފާ ދިންކަމަށް ބުނެ އެ ކްލަބުގެ ރަސްމީ އީމެއިލުން ފޮނުވާފައިވާ ސިޓީގެ މައްސަލަ ފުލުހުންނަށް ހުށަހަޅައިފިއެވެ.

ކްލަބް ވެލެންސިއާގެ ރަސްމީ އީމެއިލުން އަޒްމީން އިސްތިއުފާ ދިންކަމަށް ބުނެ އީމެއިލްކޮށްފައިވަނީ 26 ޑިސެމްބަރ 2026 ވަނަ ދުވަހުގެ ރޭގަނޑުއެވެ. އަދި ޠާރިގުއަށް ކްލަބް ވެލެންސިއާއިން ދީފައިވާ ތާއީދު ސިޓީގައި އަޒްމީން ސޮއިކޮށްފައިވަނީ، ޖެހިގެން އައި ޑިސެމްބަރ 27 ވަނަ ދުވަހުއެވެ.

މި މައްސަލައާ ގުޅިގެން ފޯނު މެދުވެރިކޮށް "ނޫން" އަށް ދިން އިންޓަވިއުއެއްގައި އަޒްމީން ވިދާޅުވީ، އޭނާ ކްލަބް ވެލެންސިއާގެ ޗެއާމަންގެ މަގާމުން އިސްތިއުފާ ދީފައި ނުވާނެކަމަށެވެ. އެހެންކަމުން، އޭނާ އިސްތިއުފާ ދިންކަމަށް ބުނެ އެފްއޭއެމްއަށް ފޮނުވާފައިވާ ސައްހަ ނޫން ސިޓީގެ މައްސަލަ ތަހުގީގު ކުރުމަށް، ކްލަބް ވެލެންސިއާއިން ޕޮލިހަށް ހުށަހަޅާފައިވާކަމަށް އޭނާ "ނޫން" އަށް ކަށަވަރުކޮށްދިނެވެ.

އަޒްމީން އިތުރަށް ވިދާޅުވީ، ތާއީދު ސިޓީގެ ކަންތައް ގަޑުބަޑުކޮށްގެން އުޅެނީ ކްލަބު މެނޭޖުމެންޓުގައި ހިލާފުވުންތަކެއް އުޅޭތީ ނޫންކަމާއި، ކްލަބް ވެލެންސިއާއިން ތާއީދު ކުރާ ކެނޑިޑޭޓު، ޠާރިގު، ނޫން ގޮތެއް ބޭނުން ވެގެން އުޅެނީ، އެ ކްލަބަށް އެކި ގޮތްގޮތުން އެހީތެރިވެދީފައިވާ ބޭފުޅެއް ކަމަށެވެ.

އެފްއޭއެމްގެ ރައީސްކަމަށް ކުރިމަތިލާން ކެންޑިޑެސީ ހުށަހަޅާއިރު، ފުރަތަމަ ޑިވިޝަނުގެ ތިން ކްލަބެއްގެ ތާއީދު އޮތްކަން ކަށަވަރުކުރަން ޖެހެއެވެ. އެގޮތުން މި އިންތިހާބަށް ކުރިމަތިލާފައިވާ ދެ ކެނޑިޑޭޓުން ވެސް ވަނީ ކްލަބް ވެލެންސިއާގެ ތާއީދު ސިޓީ ހުށަހަޅާފައެވެ.

މި އިންތިހާބުގައި ޠާރިގުގެ އިތުރުން ދެން ވާދަކުރަނީ ކްލަބް އީގަލްސްގެ ސީއީއޯ މުފާވިޒު ހާޝިމު (މުފާ) އެވެ.