ރައީސުލްޖުމްހޫރިއްޔާ އިބްރާހީމް މުހައްމަދު ޞާލިޙްގެ ސަރުކާރުން މާލޭގެ ބޯހިޔާވަކަމުގެ ދަތިކަން ހައްލުކުރުމަށް ހިންގި ބިންވެރިޔާ ސްކީމުން ގޯތި ލިބިފައިވާ ފަރާތްތަކަށް، ގޯތީގެ ރަޖިސްޓްރީ ހަވާލުކުރުމުގެ މަސައްކަތް ހައުސިންގ މިނިސްޓްރީން އިއްޔެ ފަށައިފިއެވެ.

އެމިނިސްޓްރީން ވިދާޅުވީ،  ބިންވެރިޔާ ސްކީމުގެ ދަށުން މާލެ ސަރަހައްދުން ގޯއްޗަށް އެދި ހުށަހަޅާފައިވާ ފަރާތްތަކުގެ ތެރެއިން މިހާތަނަށް ގޯތީގެ އެއްބަސްވުމާއި ގޯތީގެ ރަޖިސްޓަރީ ހަވާލުކުރެވިފައި ނުވާ ފަރާތްތަކަށް، ގޯތީގެ އެއްބަސްވުމުގައި ސޮއި ކުރުމާއި ރަޖިސްޓަރީ ޙަވާލުކުރުމުގެ އިތުރުން ބިން ޙަވާލުކުރުމުގެ މަސައްކަތް ިއްޔެ ފަށާފައިވާ ކަމަށެވެ. މިގޮތުން، ގޯތީގެ އެއްބަސްވުމުގައި ސޮއިކުރުމަށް ހަމަޖެހިފައިވާ ފަރާތްތަކަށް އެ މިނިސްޓްރީން ފޯން އަދި އެސް.އެމް.އެސްގެ ޒަރިއްޔާއިން ހާޟިރުވާނެ ތާރީޚާއި ގަޑި އަދި ތަން އަންގަމުންދާނެ ކަމުގައިވެސް، މިނިސްޓްރީ އޮފް ހައުސިންގ، ލޭންޑް އެންޑް އަރބަން ޑިވެލޮޕްމަންޓް ވަނީ ބުނެފައެވެ.

މީގެ އިތުރުން އެމިނިސްޓްރީން ވިދާޅުވީ، މިހާތަނަށް ޙަވާލުކުރެވިފައިވާ ގޯތީގެ ރަޖިސްޓްރީ ނުވަތަ އެއްބަސްވުމުގައި މައްސަލައެއް ފާހަގަ ކުރެވޭނަމަ މި މިނިސްޓްރީއަށް ހުށަހެޅުމުން އެކަމެއް ބަލައި އިސްލާޙްކޮށްދޭނޭ ކަމަށެވެ. އަދި މިއަދުމިނިސްޓްރީ އޮފް ހައުސިންގ، ލޭންޑް އެންޑް އަރބަން ޑިވެލޮޕްމަންޓްއިން ހިންގި ބިންވެރިޔާ ސްކީމުގެ އެއްބަސްވުންތައް ނޮޓަރައިޒް ކޮށްދޭނެ ފަރާތެއް ހޯދުމަށްވެސް އިޢުލާނުކޮށްފައެވެ.

ބިންވެރިޔާ ސްކީމްގެ ދަށުން ގޯތި ލިބިފައިވާ ފަރާތްތަކަށް، ރެޖިސްޓްރީ ހަވާލުކޮށް ބިން ކަނޑައިދިނުމުގެ މަަސައްކަތް އަލުން ފަށާފައި މިވަނީ، ސަރުކާރު ބަދަލުވުމަށްފަހުގައި ގާތްގަނޑަކަށް ދޮޅު މަސްފަހުންނެވެ.

ބިންވެރިޔާ ސްކީމްގެ ދަށުން ގޯތި ބޭނުންވާ ފަރާތްތަކަށް ހުޅުވާލުމުން، 23،088 މީހުން ފޯމު ހުށައެޅިއެވެ. އަދި ގޯއްޗަށް ޝަރުޠުހަމަވި އެންމެންނަށް ގޯތި ދެވެންދެން ބިންވެރިޔާ ސްކީމް ކުރިޔަށް ގެންދިޔުމަށްވެސް ކުރީ ސަރުކާރުން އޮތީ ނިންމާފައެވެ.