ރައީސުލްޖުމްހޫރިއްޔާ، ޑރ. މުޙައްމަދު މުޢިއްޒު މިފެށޭ ހަފްތާގެ ތެރޭގައި، ޗައިނާއަށް ފުރަމާނަ ދަތުރުފުޅެއް ކުރެއްވުމަށް ހަމަޖެހިއްޖެއެވެ.

ސަރުކާރުގެ އިސްބޭފުޅަކު މައުލޫމާތު ދެއްވި ގޮތުގައި ރައީސުލްޖުމްހޫރިއްޔާ ޗައިނާއަށް ކުރައްވާ ފުރަމާނަ ދަތުރުފުޅާއި ގުޅޭ މައުލޫމާތު ސަރުކާރުން ވަރަށް އަވަހަށް ހާމަކުރައްވާނެއެވެ.

ރައީސުލްޖުމްހޫރިއްޔާ ޗައިނާއަށް ކުރައްވާ ފުރަމާނަ ދަތުރުފުޅުގައިވެސް، ދިވެހި ސަރުކާރުގެ މަތީފެންވަރުގެ ވަފުދެއް އެމަނިކުފާނުގެ އަރިހުގައި ބައިވެރިވެވަޑައިގަންނަވާނެއެވެ. މިސަރުކާރަކީ، ޚާއްޞަކޮށް ޗައިނާ އާއި އަދި ޢަރަބި އިސްލާމީ ދުނިޔޭގެ ޤައުމުތަކާއި ބަދަހިގުޅުމެއް އޮންނާނެ ސަރުކާރެއްކަން، ސަރުކާރުގެ އިސްވެރިން ވަނީ ހާމަކުރައްވާފައެވެ.

ރައީސުލްޖުމްހޫރިއްޔާ ފުރަމާނަ ދަތުރުފުޅެއްގައި ޗައިނާއަށް ވަޑައިގެންނެވުމަށް ހަމަޖެހިފައި ވާއިރު، ރައިސުލްޖުމްހޫރިއްޔާގެ ނައިބު އަލްއުސްތާޛު ޙުސައިން މުޙައްމަދު ލަޠީފުވެސް ވަނީ، މި ދިޔަ ޑިސެމްބަރު މަހުގެ ތެރޭގައި ޗައިނާއަށް ވަޑައިގެންފައެވެ.

ރައީސުލްޖުމްހޫރިއްޔާ، ޑރ. މުޙައްމަދު މުޢިއްޒު ވެރިކަަމަށް ވަޑައިގެންނެވުމަށްފަހުގައި، އެމަނިކުފާނުގެ ފުރަތަމަ ފުރަމާނަ ދަތުރުފުޅުގައި ވަޑައިގެންނެވީ، ތުރުކިޔޭއަށެވެ. އޭގެ ފަހުގައި ކޮޕްސަމިޓްގައި ބައިވެރިވެވަޑައިގެންނެވުމަށްޓަކައި، ޔޫއޭއީއަށް ވަޑައިގެންނެވިއެވެ.