މިހިނގާ ޖެނުއަރީ މަހުންފެށިގެން ސަލާމަތީ ޚިދުމަތްތަކުގެ މުސާރަތަކަށް ބަދަލު ގެނެވެން ނެތްކަމުގައި ސަރުކާރުން އެއިދާރާތަކަށް އަންގައިފިއެވެ.

ސަރުކާރުގެ އިސްބޭފުޅަކު، ވިދާޅުވީ، ފުލުހުންނާއި ސިފައިންގެ މުސާރަ ބޮޑުކުރެއްވުމަށް ރައިސުލްޖުމްހޫރިއްޔާ، ޑރ. މުހައްމަދު މުޢިއްޒު ވަޢުދުވެވަޑައިގެންފައި ވީނަމަވެސް، ދައުލަތުގެ މާލީ ޙާަތު ހުރިގޮތުން ފުލުހުންނާއި ސިފައިންގެ މުސާރަތައް ބޮޑު ކުރުން ވަނީ ތިން މަހަށް ފަސްކޮށްފައި ކަމަށެވެ. މިގޮތުން އައު ޕޭ ފްރޭމްވޯކަށް ޢަމަލުކުރުމަށް މިހާރު ސަރުކާރުން ނިންމާފައި ވަނީ މާރިޗު މަހުން ފެށިގެން ކަމުގައި އޭނާ ވިދާޅުވިއެވެ.

ނޭޝަނަލް ޕޭ ކޮމިޝަނުން މުސާރަތައް ބޮޑުކުރެވެން ނެތްކަމަށް ފުލުހުންނާއި ސިފައިންނަށް އަންގާފައި ވަނީ މިއަދުކަމަށް އެއިދާރާތަކުން ވަނީ ބުނެފައެވެ.

ފުލުހުންގެ އިދާރާއިން ވިދާޅުވީ، 2024 މާރިޗު 1 އިން ފެށިގެން ފުލުހުންގެ މުސާރަ ބޮޑުކުރެވޭނެކަން ފިނޭންސް މިނިސްޓްރީއިން ފުލުހުންނަށް ވަނީ އަންގާފައިވާ ކަމަށެވެ. 

އެމްއެންޑީއެފުންވެސް ވިދާޅުވީ، 2024 މާރިޗު 1 އިން ފެށިގެން ސިފައިންގެ މުސާރަ ބޮޑުކުރެވޭނެކަން ފިނޭންސް މިނިސްޓްރީއިން އެމްއެންޑީއެފަށް ވަނީ އަންގާފައިވާ ކަމަށެވެ.