ކުއްލި ޙާލަތްތަކުގައި ބަލިމީހުންނަށް ފަރުވާދިނުމަށްޓަކައި މާލެއާއި ވިލިމާލެއާ ދެމެދު ސީ އެންމެބިއުލާންސްގެ ޚިދުމަތް ދޭން ފަށައިފިއެވެ.

މި ޚިދުމަތް ފެށުމުގެ ގޮތުން ހެލްތް މިނިސްޓްރީއާއި ދަރުމަވަންތައް ހޮސްޕިޓަލާ ދެމެދުވަނީ އެއްބަސްވުމެއްގައި ސޮއިކުރައްވާފައެވެ. އެއްބަސްވުމުގައި ހެލްތް މިނިސްޓްރީގެ ފަރާތުން ސޮއިކުރައްވާފައިވަނީ މިނިސްޓަރ ޑރ.ޢަބްދުﷲ ޚަލީލެވެ. އަދި މާލެ ސިޓީ ގްރޫޕް އޮފް ހޮސްޕިޓަލްސްގެ ފަރާތުން ސޮއިކުރެއްވީ ދަރުމަވަންތަ ހޮސްޕިޓަލްގެ ސީއީއޯ އިބްރާހިމް އަބްދުލް ރައްޒާޤު ހަލީމެވެ.

މި ރަސްމިއްޔާތުގައި ދަތުރުފަތުރާއި މަދަނީ އުދުހުންތަކާ ބެހޭ ވަޒީރު މުޙައްމަދު އަމީން ވަނީ ސީއެންބިއުލާންސްގެ ރަމްޒީ ތަޅުދަނޑި ދަރުމަވަންތަ ހޮސްޕިޓަލްގެ ސީއީއޯއާ ހަވާލުކޮށްދެއްވާފައެވެ.

ސީއެންބިއުލާންސް ޚިދުމަތް ފެށުމުގެ ރަސްމިއްޔާތުގައި ހެލްތް މިނިސްޓަރ ޑރ.ޢަބްދުﷲ ޚާލީލް ވިދާޅުވީ، މާލެއާއި ވިލިމާލެއާ ދެމެދު ބޭނުންކުރާ ސީ އެންމެބިއުލާންސްއަކީ ރާއްޖޭގައި ބޭނުންކުރާ އެހެން ސީއެންބިއުލާންސްތަކަށްވުރެ ޖާގައިގެ ގޮތުން ތަނަވަސް އެންބިއުލާންސްއެއް ކަމަށެވެ. އަދި އެންބިއުލާންސްގެ ޚިދުމަތް ފުޅާ ކުރުމަށްޓަކައި އިތުރު ވަޞީލަތްތައް ހަރުކުރަންޖެހިއްޖެނަމަ އެ ވަޞީލަތްތައްވެސް ހަރުކުރައްވާނެކަން މިނިސްޓަރ ފާހަގަކުރެއްވިއެވެ.

ވިލިމާލެ ހޮސްޕިޓަލަކީ 24 ގަޑިއިރަށް ޚިދުމަތްދޭ ހޮސްޕިޓަލެކެވެ. މިވަގުތު އެ ހޮސްޕިޓަލުގައި ޚިދުމަތްދެނީ 5 އެނދުގެ އިމަޖެންސީ ރޫމަކާއި، ބަލިމީހުން ބެލުމަށް ޚާއްޞަ 3 ކޮޓަރިއާއެކުއެވެ. ޚާއްޞަ ބަލިތަކުގެ ޚިދުމަތް ދެނީ އައި.ޖީ.އެމް.އެޗްގެ ސްޕެޝަލިސްޓުން އެ ހޮސްޕިޓަލަށް ގޮސްގޮސްގެންނެވެ. ކުއްލި ފަރުވާ ދޭންޖެހޭ ޙާލަތެއްގައި ޚިދުމަތް ދިނުމަށް ބަލިމީހާ ފޮނުވަނީ އައި.ޖީ.އެމް.އެޗަށެވެ.