މިއަހަރު ބޭއްވުމަށް ހަމަޖެހިފައިވާ ރައްޔިތުން މަޖިލީހުގެ އިންތިޚާބު ބާއްވާނޭ ތާރީޚެއް އެންމެ ލަސްވެގެން އާދީއްތަ ދުވަހު އިލެކްޝަންސް ކޮމިޝަނުން އިޢުލާނު ކުރައްވާނެ ކަމުގައި އެކޮމިޝަންގެ ރައީސް ފުވާދު ތައުފީޤު ވިދާޅުވެއްޖެއެވެ.

"ނޫން"އަށް މައުލޫމާތު ދެއްވަމުން ފުވާދު ވިދާޅުވީ، މަޖިލިސް އިންތިޚާބު ބާއްވާނޭ ދުވަހެއް ފައިނަލް ކުރުމަށްޓަކައި މިއަދާއި މާދަމާވެސް ކޮމިޝަނުން ކުރަންޖެހޭ މަސައްކަތްތައް ކުރާނެ ކަމަށެވެ. އަދި އެންމެ ލަސްވެގެން އާދީއްތަ ދުވަހު އިންތިޚާބު ބާއްވާނެ ތާރީޚު އިއުލާނު ކުރެވޭނެ ކަމުގައި ފުވާދު ވިދާޅުވިއެވެ.

ފުވާދު ވިދާޅުވީ، ރޯދައިގެ ފަހުން ނުވަތަ ރޯދައިގެ ކުރިންވެސް އިންތިޚާބު ބޭއްވޭނެ ގޮތްތަކެއް އޮތްތޯ ކޮމިޝަނުންވެސް މަޝްވަރާކުރި ކަމަށެވެ. އެހެން ނަމަވެސް މިހާރު އޮތް ގޮތުން އިންތިޚާބު ބޭއްވެން އޮތީ ރޯދަމަހުގެ ތެރޭގައިކަންވެސް ފުވާދު ފާހަގަކުރެއްވިއެވެ.

ފުވާދު ވިދާޅުވީ، އިންތިޚާބު ރޯދައިގެ ފަހަށް ލަސްކުރަން ބަލާއިރު، މިހާރު ދިވެހިންގެ އާދަކާދަތަކާއި ދީނީކަންކަމަށް ބަލާއިރު ރޯދަމަހާއި ވިދިގެން އަންނަ ހަރޯދައަކީވެސް ހަމަ ރޯދަމަސް ފަދައިން ކަން އޮންނަ ދުވަސްތަކެއް ކަމަށެވެ. ހަމައެގޮތަށް ރޯދަމަހުގެ ފަހު ދިހައެއް ސަރުކާރު ބަންދު ދުވަސްތަކެއްގެ ގޮތުގައި ހަމަޖައްސަވާފައިވާއިރު، ފަހުދިހަޔާއި އެކު ގިނަ ދުވަސްތަކެއް ސަރުކާރު ބަންދުވެގެން ދިޔުމަކީވެސް އެދުވަސްވަރު އިންތިޚާބު ބޭއްވުމުގައި އޮތް ގޮންޖެހުމެއް ކަމަށެވެ.

މިހާރު ހިގަމުންދާ ރައްޔިތުންގެ މަޖިލީހުގެ އުމުރު 27 މެއިއަށް ހަމަ ވާނެއެވެ. ޤާނޫނުގައި ބަޔާންކޮށްފައިވާ ގޮތުން އައު ދައުރަށް މަޖިލިސް ހޮވައި އިންތިޚާބުގެ ކަންކަން އެއްމަސްދުވަސް ކުރިން އިލެކްޝަންސް ކޮމިޝަނުން ނިންމަންޖެހޭނެވެ. 

މިއަހަރުގެ ރޯދަމަސް ފެށޭނީ، މާރިޗު 11 ގައެވެ. އަދި ރޯދަމަސް 9 އޭޕްރީލްގައި ނިމޭއިރު ހަރޯދަ ނިމޭނީ، އޭޕްރީލް މަހުގެ 16 ވަނަ ދުވަހުގައެވެ. ރޯދައިގެ ފަހަށް އިންތިޚާބު ލަސްކޮށްފިނަމަ، ޤާނޫނުގައި ބުނެފައިވާ މުއްދަތަށް އިންތިޚާބުގެ ކަންކަން ނިންމާނުލެވުމުގެ ފުރުޞަތު އޮންނާނެ ކަމުގައިވެސް އިލެކްޝަންސް ކޮމިޝަނުން ވަނީ ބުނެފައެވެ.