ދިވެހިރާއްޖޭގައި ކްރިއޭޓިވް އިކޮނޮމީއެއް ބިނާކުރުމަށް ނިންމަވައި އެކަމަކާއި ގުޅޭ ގޮތުން ވަޒީރުންގެ މަޖިލީހުގައި މަޝްވަރާކުރައްވައިފިއެވެ.

މިގޮތުން، ވަޒީރުންގެ މަޖިލީހުގައި ކުރެއްވި މަޝްވަރާތަކަށް ފަހުގައި، ދިވެހިރާއްޖޭގައި ކްރިއޭޓިވް އިކޮނޮމީއެއް ބިނާކުރުމާއި ގުޅޭގޮތުން ރައީސުލްޖުމްހޫރިއްޔާ ނިންމެވި ކަންކަމުގެ ތެރޭގައި، ދައުލަތުގެ ގިނަ ވުޒާރާތައް އެކުލެވޭގޮތަށް ނޭޝަނަލް ކްރިއޭޓިވް އިކޮނޮމިކް ކޮމެޓީގެ ނަމުގައި ކޮމެޓީއެއް އެކުލަވާލައި އެ ކޮމެޓީން ޤައުމީ ފެންވަރުގައި ކްރިއޭޓިވް އިކޮނޮމީއެއްގެ ސްޓްރެޓެޖީއެއް އެކުލަވާލުން ހިމެނޭ ކަމުގައި، ރައީސުލްޖުމްހޫޜިއްޔާގެ އޮފީހުގެ ޕަބްލިކް ޕޮލިސީ ސެކްރެޓަރީ އަބްދުﷲ ނާޒިމް ނޫސްވެރިންނަށް މައުލޫމާތު ދެއްވަމުން ވިދާޅުވިއެވެ.

މީގެ އިތުރުން ކްރިއޭޓިވް އިކޮނޮމީއަކަށް ދަރިވަރުން ބައްޓަންކުރުމަށް ތަޢުލީމީ މަންހަޖުގައި ހުރިކަންކަން ދެނެގަނެ އެކަމާއި ގުޅޭ މަސައްކަތްތައް ކުރެއްވުމާއި، ބައިނަލްއަޤްވާމީ އާޓްސް ސްކޫލެއްގެ ފެކަލްޓީއެއް ޤާއިމުކުރުމަށާއި، ސަރަޙައްދީ ފެންވަރުގެ ޕްރޮޑަކްޝަން ހައުސްއެއް ޤާއިމުކުރުން ވެސް ހިމެނޭ ކަމުގައި ނާޒިމް ވިދާޅުވިއެވެ، މިގޮތުން ޕްރޮޑަކްޝަން ހައުސް ޤާއިމްކުރުމަށް ނިންމާފައި ވަނީ، ޗާންދަނީ މަގުގައި ކުރިން ބޭންކް އޮފް ސިލޯން ހިންގި ބިން ބީސީސީއަށް ދީގެންކަމުގައިވެސް ނާޒިމް ވިދާޅުވިއެވެ.

އަދި ފަންނީ އަދި އީޖާދީ މަސައްކަތްކުރުމަށް ޝައުޤުވެރިވާ ފަރާތްތަކަށް ބޭނުންވާ މާލީ އެހީތެރިކަން ފޯރުކޮށްދިނުމަށް ފަންޑެއް އުފައްދައި، ބިޒްނަސް ސެންޓަރ ކޯޕަރޭޝަން (ބީ.ސީ.ސީ)ގެ ބެލެނިވެރިކަމުގެ ދަށުން އެފަންޑުން ޚިދުމަތްދިނުމަށް ހަމަޖައްސަވާފައި ވާކަމަށާއި، އެގޮތުން ފޯރުކޮށްދެވޭ ޚިދުމަތްތަކުގެ ތެރޭގައި ކްރިއޭޓިވް އިކޮނޮމީގައި ހަރަކާތްތެރިވާން ބޭނުންވާ ފަރާތްތަކަށް އިންކިއުބޭޓަރ ޚިދުމަތް ފޯރުކޮށްދިނުމާއި ފަންޑުކޮށްދިނުން ހިމެނޭނެކަމުގައިވެސް އޭނާ ވިދާޅުވިއެވެ. 

ނާޒިމް ވިދާޅުވީ، މިކަމަކީ އިޤުތިޞާދު ސިންދަފާތުކޮށް ރާއްޖޭގެ އިޤުތިޞާދު ފުޅާކުރެއްވުމަށް ސަރުކާރުން ކުރައްވަމުން އަންނަ މަސައްކަތްތަކުގެ ތެރޭގައި ހިމެނޭ މުޙިއްމު ސިނާޢަތެއް ކަމަށެވެ.