ކ. ކާށިދޫ އާއި ނ. ވެލިދޫ އަދި ލ. އަތޮޅުގެ ރަށެއްގައި ޑްރަގް ރިހެބިލިޓޭޝަން ސެންޓަރުތައް ޤާއިމްކުރެއްވުމަށް ރައީސުލްޖުމްހޫރިއްޔާ> ޑރ. މުޙައްމަދު މުޢިއްޒު ނިންމަވައިފިއެވެ.

އެމަނިކުފާނު މިގޮތަށް ނިންމެވީ، 31 ޑިސެމްބަރު 2023ގައި ބޭއްވި ވަޒީރުންގެ މަޖިލީހުގެ 6 ވަނަ ބައްދަލުވުމުގައި މިނިސްޓްރީ އޮފް ހޯމްލޭންޑް ސެކިއުރިޓީ އެންޑް ޓެކްނޯލޮޖީ، އިން ހުށަހެޅުއްވި ކަރުދާހުގެ މައްޗަށް ވަޒީރުންގެ މެދުގައި މަޝްވަރާކުރެއްވުމަށް ފަހުގައެވެ.

އެގޮތުން މަސްތުވާތަކެތި ބޭނުންކުރާ ފަރާތްތަކަށް ކޮމިއުނިޓީބޭސްޑް ރިހެބިލިޓޭޝަން ޕްރޮގްރާމް، ކަމާބެހޭ ފަރާތްތަކުގެ އެހީތެރިކަން ހޯއްދަވައިގެން، ދިވެހިރާއްޖޭގެ ޤާނޫނާއި، ގަވާއިދާ އެއްގޮތްވާގޮތުގެ މަތިން އަދި އިސްލާމީ ހަމަތަކަށް ފެތޭގޮތަށް ހިންގަން ފެށުމަށްވަނީ ރައީސުލްޖުމްހޫރިއްޔާ ވަނީ ނިންމަވާފައި ކަމުގައި، ރައީސުލްޖުމްހޫރިއްޔާގެ އޮފީހުގެ ޕަބްލިކް ޕޮލިސީ ސެކްރެޓަރީ އަބްދުﷲ ނާޒިމް ދާޅުވިއެވެ.

ނާޒިމް ވިދާޅުވީ، ލ. އަތޮޅުގައި ރިހެބިލިޓޭޝަން ސެންޓަރު ޤާއިމްކުރާނޭ ވަކިރަށެއް އަދި ކަނޑައަޅާފައި ނުވާކަމަށާއި، އެއަތޮޅުގައި ސެންޓަރު ޤާއިމްކުރާނެ ރަށެއް ނިންމަވާނީ އެކަމާއި ގުޅޭގޮތުން ކައުންސިލްތަކާއި މަޝްވަރާކުރެއްވުމަށް ފަހުގައި ކަމަށެވެ.

މަސްތުވާތަކެތީގެ މައްސަލައަކީ ރާއްޖޭގައި އޮތް އެންމެ ބޮޑު އިޖުތިމާޢީ މައްސަލައެވެ. އެމައްސަލައަށް އެެކަށީގެންވާ ހައްލެއް ހޯދުމަށް ސަރުކާރުތަކުން ނުކުޅެދިފައިވާއިރު އަހަރުން އަހަރަށް ރާއްޖޭގައި މަސްތުވާތަކެތީގެ ސަބަބުން ނުކުންނަ މައްސަލަތައް އަންނަނީ އިތުރުވަމުންނެވެ.