މާޅޭ ސިޓީގެ މޭޔަރުގެ ކަމުގެ މަޤާމަށް ޕީއެންސީގެ ޓިކެޓްގައި ވާދަކުރައްވާ، ކުރީގެ ބަންޑާރަ ނައިބު އަލްއުސްތާޛާ އާއިޝަތު އާޒިމާ ޝަކޫރާއި ދެކޮޅަށް، މޯލްޑިވުސް އިސްލާމިކް ބޭންކުން ކޮށްފައިވާ ދައުވާގެ ޝަރީއަތް ނިންމައި، އާޒިމާ އެބޭންކަށް 4.1 މިލިއަން ރުފިޔާ ދައްކަން ޖެހޭކަމަށް ކަނޑައަޅައި، އެފައި ހަމަސް ދުވަހުގެ ތެރޭގައި ދައްކައި ޚަލާސްކުރުމަށް ސިވިލްކޯޓުން އާޒިމާގެ މައްޗަށް ހުކުމްކޮށްފިއެވެ.

ސިވިލްކޯޓުގެ ހުކުމުގައި ބަޔާންކޮށްފައިވާ ގޮތުން އެމައްސަލައިގެ ހުކުމް އިއްވުވުމުގެ ޝަރީޢަތުގެ މަޖިލިހަށް އާޒިމާ ހާޟިރުވެފައިނުވާތީ އާޒިމާގެ މައްޗަށް ޙުކުމްކޮށްފައި ވަނީ އޭނާގެ ޣައިރު ހާޟިރުގައެވެ،

ސިވިލްކޯޓުގެ ހުކުމްގައި ބަޔާންކޮށްފައިވާ ގޮތުން އާޒިމާ މޯލްޑިވްސް އިސްލާމިކް ބޭންކަށް ދައްކަންޖެހޭ ފައިސާއަކީ، ޑިމިނިޝިން މުޝާރަކް ޕްރޮޕަޓީ ފައިނޭންސިންގ ފެސިލިޓީގެ ދަށުން، ދޫކޮށްފައިވާ 3.1 މިލިޔަން ރުފިޔާ އޭނާ ދައްކާފައި ނުވާތީ، ޖޫރިމަނާ އާއި ޗެރިޓީގެ ގޮތުގައި ދައްކަންޖެހޭ ޖުމުލަ، 4.15 މިލިޔަން ރުފިޔާއެވެ.

އަދި އެފެސިލިޓީ ނެގުމަށް އާޒިމާ އެބޭންކުގައި ރަހުނުކޮށްފައިވާ، ހުޅުމާލެ ލޮޓް ނަމްބަރު، 10321 ގޯއްޗާއި، އާޒިމާގެ ނަމުގައި ހުޅުމާލެއިން ގަނެފައިވާ ޕްލެޓިނަމް ފްލެޓްާއި މެދު ރަހުނުގެ އެއްބަސްވުމުގެ ދަށުން މޯލްޑިވިސް އިސްލާމިކް ބޭންކަށް ލިބިދެވޭ ހައްޤުތާކާއި ބާރުތައް ދެމި އޮންނާނެ ކަމުގައިވެސް ޙުކުމްގައި ބުނެފައިވެއެވެ.

އާޒިމާގެ މައްޗަށް ސިވިލްކޯޓުން މިއަދު ހުކުމްކޮށްފައި ވަނީ، މޯލްޑިވުސް އިސްލާމިކް ބޭންކަށް އާޒިމާ ދައްކަންޖެހޭ، 4.15 މިލިޔަން ރުފިޔާ، ކަނޑައެޅިފައިވާ ގޮތަށް މަހުންމަހަށް ބަހާލައިގެން 2 ޖުލައި 2024ގެ ކުރިން ދައްކައި ޚަލާސްކުރުމަށެވެ.