ރައީސުލްޖުމްހޫރިއްޔާ ޑރ މުޙައްމަދު މުއިއްޒު ވެލެއްވި ވައުދުފުޅާ އެއްގޮތަށް، ރައީސް އިބްރާހިމް މުހައްމަދު ޞާލިޙްގެ ދައުރުގައި ދޭން ނިންމި ފްލެޓުތަކުގެ ރެޖިސްޓްރީ، މިހަފްތާ އައި މިއަންނަ ހަފްތާގެ ތެރޭގައި ދޫކުރާނެކަމަށް، ރައީސުލްޖުމްގޫރިއްޔާ ވިދާޅުވެއްޖެއެވެ.

ރައީސުލްޖުމްހޫރިއްޔާ މިހެން ވިދާޅުވީ، މީގެ އިރުކޮޅެއް ކުރިން، 'އެކްސް' ގައި އެމަނިކުފާނު ކުރެއްވެވި ޕޯސްޓެއްގައެވެ.

"ގޯތި އަދި ފްލެޓް ލިބޭނެ ކަމަށް ފައިނަލް ލިސްޓްގައި ހިމެނި ގެޒެޓްކޮށްފައިވާ ފަރާތްތަކަށް ރެޖިސްޓްރީ ހަދައިދީ، ގޯތި/ފްލެޓް ހަވާލް ކުރުމަކީ އަޅުގަނޑު ވައުދުވީ ގޮތަށް ކުރިޔަށް ދާނެކަމެއް. މި ހަފްތާއައި މިއަންނަ ހަފްތާ ތެރޭ ރެޖިސްޓްރީ ހަވާލުކޮށް ނިންމުމުގެ މަސައްކަތް ހައުސިން މިނިސްޓްރީއިން ކުރިޔަށް ގެންދާނެ"، ރައީސުލްޖުމްހޫރިއްޔާ ކުރެއްވެވި ޕޯސްޓްގައި ވެއެވެ.

މީގެ އިތުރުން، ރައީސް އިބްރާހިމް މުހައްމަދު ޞާލިޙްގެ ދައުރުގައި ބިން ދޫކޮށްފައިވާ ބައެއް ތަންތަނަކީ ނުހިއްކާ ހުރި ފަޅުތަކެއް ކަމުން، އެ ފަޅުތައް ހިންގުމުގެ މަސައްކަތް ބާރަށް ކުރިޔަށް ގެންދަވާނެކަމަށް ވެސް އެމަނިކުފާނު ވިދާޅުވެފައިވެއެވެ. 

މީގެ އިތުރުން، ގުޅީ ފަޅާ، ގިރާވަރު ފަޅުން އިތުރު ބިން ހިއްކުމުގެ މަސައްކަތް ވެސް އެ މަނިކުފާނުގެ ސަރުކާރުން ކުރިޔަށް ގެންދަވާކަމަށް ވިދާޅުވިއެވެ.

ރައީސް ޞާލިހުގެ ސަރުކާރުގެ "ގެދޮރުވެރިޔާ" ސްކީމުގެ ދަށުން ފްލެޓަށް އެދި 20،697 މީހުން ފޯމު ހުށަހެޅިއިރު އޭގެ ތެރެއިން 13،000 އަށްވުރެ ގިނަ މީހުން ޝަރުތު ހަމަވާކަމަށް ކުރީ ސަރުކާރުން ނިންމެވިއެވެ. އަދި ފުރަތަމަ 4،000 ފްލެޓް ލިބޭ މީހުން ކަށަވަރުކޮށްފައިވަނީ އެންމެ މަތިން މާކްސް ލިބުނު މީހުންގެ ތަރުތީބުންކަމަށް ކުރީ ސަރުކާރުގެ ޕްލޭނިންގ މިނިސްޓްރީން ވިދާޅުވިއެވެ.