ފުޓުބޯޅަ އެސޯސިއޭޝަން އޮފް ދަ މޯލްޑިވްސް (އެފްއޭއެމް)ގެ ރައީސަކު އިންތިހާބު ކުރުމަށް ބާއްވާ އިންތިހާބުގައި،  ކޮމިޝަނަރ އޮފް ސްޕޯޓްސް، މުޙައްމަދު ޠަލާލު ވަކިކޮޅަކަށް ޖެހިފައިވާކަމަށް، އެ އިންތިހާބުގައި ވާދަކުރައްވާ ކްލަބް އީގަލްސްގެ ސީއީއޯ މުފާވިޒު ހާޝިމު (މުފާ) ތުހުމަތުކޮށްފިއެވެ.

ރާއްޖޭގެ ނޫހަކަށް ދިން އިންޓަވިއުއެއްގައި މުފާ ވިދާޅުވީ، މި އިންތިހާބުގެ ކަންތައްތަކާއި ގުޅިގެން ސްޕޯޓް ކޮމިޝަނަރގެ އަމަލުތައް ހުރިގޮތުން، ކޮމިޝަނަރގެ މަސްއޫލިއްޔަތުތަކުން ބޭރުން މަސައްކަތްކޮށް، ވަކި ކެނޑިޑޭޓަކު އިންތިހާބުކުރަން މަސައްކަތްކުރާކަން ފާހަގަކުރެވޭ ކަމަށެވެ.

"މިކަމުގައި އަދި ބޮޑަށް ފެންނަނީ ސްޕޯޓްސް ކޮމިޝަނާ ވަކިކޮޅަކަށް ޖެހިގެން ތެޅިފޮޅިގެން އުޅޭތަން. ހީވާ ކަހަލަ ކްލަބްތަކުން ސިޓީގައި ސޮއި ކުރާނެ މީހާ އާއި ވޯޓްލާން ދާނެ މީހާ ވެސް ކަނޑައަޅަން ހުންނަ މަގާމެކޭ ސްޕޯޓްސް ކޮމިޝަނާގެ މަގާމަކީ،" މުފާ ވިދާޅުވެފައިވެއެވެ.

މުފާ މިހެން ވިދާޅުވީ، އިންތިހާބާ ގުޅިގެން ކްލަބް ވެލެންސިއާގެ ޗެއާމަން އަބްދުﷲ އަޒްމީން ސޮއިކޮށް އެފްއޭއެމްގެ އިލެކްޓޯރަލް ކޮމެޓީއަށް ފޮނުވި ސިޓީއަކީ ސައްޙަ ސިޓީއެއްކަން އެންގުމަށް ކޮމިޝަނަރ އޮފް ސްޕޯޓްސް ދީފައިވާ ލިޔުމެއް ވެސް އެ ކޮމިޓީއަށް ހުށަހަޅާފައިވާތީއެވެ.

އެފްއޭއެމްގެ ރައީސްކަމަށް ކުރިމަތިލާން ކެންޑިޑެސީ ހުށަހަޅާއިރު، ފުރަތަމަ ޑިވިޝަނުގެ ތިން ޓީމެއްގެ ތާއީދު އޮތްކަން ކަށަވަރުކުރަން ޖެހެއެވެ. އެގޮތުން މި އިންތިހާބަށް ކުރިމަތިލާފައިވާ ދެ ކެނޑިޑޭޓުން ވެސް، ވެލެންސިއާގެ ތާއީދު ސިޓީ ވަނީ ހުށަހަޅާފައެވެ.

މިކަމާ ގުޅިގެން ކްލަބް ވެލެންސިއާއިން އެފްއޭއެމްގެ އިލެކްޓޯރަލް ކޮމެޓީއަށް ފޮނުވި ސިޓީގައި ބުނާ ގޮތުން، އެފްއޭއެމްގެ ރައީސަކަށް ގެނައުމަށް އެ ކްލަބުން ތާއީދުކުރަނީ ރައްޔިތުންގެ މަޖިލީހުގެ މަހިބަދޫ ދާއިރާގެ މެމްބަރު، އަހްމަދު ޠާރިގު (ޓޮމް) އަށެވެ. އަދި އެ ކްލަބުން މި ގޮތަށް ނިންމީ، މި މަގާމަށް އެންމެ ގާބިލް ބޭފުޅަކީ ޓޮމްކަމަށްވެފައި، ފުޓުބޯޅަ ކުރިއެރުވުމަށް އެކަށޭނަ މަސައްކަތްތަކެއް ކުރެވޭނެ ބޭފުޅަކީ ވެސް ޓޮމްކަމަށް އެ ކްލަބުން ގަބޫލު ކުރާތީ ކަމުގައި އެ ސިޓީގައި ވެއެވެ.

ސޯޝަލް މީޑީއާގައި ޓޮމް ހިއްސާކުރައްވާފައިވާ ގޮތުގައި، އެފްއޭއެމްގެ އިންތިހާބުގައި ވާދަކުރުމަށް، މުފާ ހުށަހަޅުއްވާފައިވާ ކްލަބް ވެލެންސިއާގެ ތާއީދު ސިޓީއަކީ ފޯޖުކޮށްފައިވާ ސިޓީއެކެވެ.

މިކަމަށް ރައްދު ދެއްވައި މުފާ ވިދާޅުވީ، އޭނާ ހުށަހަޅާފައިވާ ވެލެންސިއާގެ ތާއީދު ސިޓީއަކީ "ފޯޖް" ކޮށްފައިވާ ސިޓީއެއް ކަމަށް ކުރާ ތުހުމަތުތަކުގެ ހަގީގަތް ތަހުގީގުން ސާފު ވާނެކަމަށެވެ.