އެމެރިކާގެ ދިފާޢީ މައިމަރުކަޒު، ޕެންޓަގަންގެ ކައިރީގައި އެއްޗެއް ގޮއްވާލާ މަންޒަރު ފެންނަގޮތަށް އާޓިފިޝަލް އިންޓެލިޖެންސް ބޭނުންކޮށްގެން ހަދާފައިވާ ފޭކު ފޮޓޯއެއް ވައިރަލްވެ ބައެއް މީހުންނާއި މީޑިއާތަކަށްވެސް ލަނޑުލިބިއްޖެއެވެ.

އާޓިފިޝަލް އިންޓެލިޖެންސް ބޭނުންކޮށްގެން އުފައްދާފައިވާ މި ފޮޓޯގައި ފެންނަނީ ހަޤީޤަތެއްކަމުގައި ހީކޮށް ދުނިޔޭގެ ނަން މަޝްހޫރު ބައެއް ފަަރާތްތަކުގެ ވެރިފައިޑް އެކައުންޓްތަކުން ވަނީ ސޯޝަލް މީޑިއާ ޕްލެޓްފޯމްތަކުގައި އެފޮޓޯ ފަތުރާފައެވެ. އަދި އިންޑިއާ އާއި ބައެއް އެހެން ޤައުމުތަކުގެ އޮންލައިން ނޫސްތަކާއި ޓީވީތަކުންވެސް އެޚަބަރު ފެތުރިއެވެ. މީޑިއާތަކަށްވެސް އޮޅުން އެރީ ވެރިފައިޑް އެކައުންޓްތަކުން އެ ފޮޓޯ ފަތުރަންފެށުމުންނެވެ.

އެކަމަކު އެއީ އާޓިފިޝަލް އިންޓަލިޖެންސްގެ ބޭނުން ނަހަމަގޮތުގައި ހިފައިގެން ކޮށްފައިވާ ކަމެއްކަން ފަހުން ހާމަވުމާއިއެކު ކަމާއި ބެހޭ ފަރާތްތަކުންވެސް ވަނީ އެކަމުގެ ކަންބޮޑުވުންތައް ފާޅުކޮށްފައެވެ.

އެމެރިކާގެ ޑިފެންސް ޑިޕާޓްމަންޓުން ވަނީ އެ ފޮޓޯއަކީ ފޭކް ފޮޓޯއެއްކަން ކަށަވަރުކޮށްދީފަ އެވެ. އަދި އެފޭކް ފޮޓޯގެ ސަބަބުން އެމެރިކާގެ ޙިއްސާގެ ބާޒާރަށްވެސް ކޮންވެސް މިންވަރަކަށް އަސަރުކުރިކަމުގައިވެސް ސީއެންއެންއިން ރިޕޯޓްކޮށްފައިވެއެވެ.

އާޓިފިޝަލް އިންޓަލިޖެންސްގެ ނަހަމަ ބޭނުންހިފައިގެން ހިންގާ އޮންލައިން ކުށްތައް އިތުރުވަމުން އަންނައިރު، އާޓިފިޝަލް އިންޓަލިޖެންސްގެ މުއާމަލާތްތައް ރެގިއުލޭޓްކުރުމަށްވެސް ތަޖުރިބާކާރުން އަންނަނީ ގޮވާލަމުންނެވެ.