ކިއުބާގައި ފާހަގަކުރާ، އެޤައުމުގެ އިންޤިލާބީ ދުވަހުގެ މުނާޞަބަތުގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ކިއުބާގެ ވެރިންނަށް ތަޙްނިޔާ ފޮނުއްވައިފިއެވެ.

ރައީސް މިގޭލް ޑިއާޒް-ކެނެލް ބާމުޑޭޒް އަށާއި ކިއުބާގެ ބޮޑު ވަޒީރު މެނުއެލް މަރޭރޯ ކްރޫޒްއަށް ވަކިވަކިން ފޮނުއްވެވި މެސެޖުގައި، ކިއުބާގެ އިންޤިލާބީ ދުވަހުގެ ތަހުނިޔާއާ އިޙްލާޞްތެރި ހެޔޮއެދުންތައް އެޤައުމުގެ ރައީސްއާ ބޮޑުވަޒީރަށާއި އަދި އެ ޤައުމުގެ ސަރުކާރާއި ރައްޔިތުންނަށް ފޮނުއްވިއެވެ.

ކިއުބާގައި، އިންޤިލާބީ ދުވަހުގެ ގޮތުގައި ފާހަގަކުރަނީ، ކޮންމެ އަހަރެއްގެ ޖެނުއަރީ މަހުގެ 1 ވަނަ ދުވަހެވެ. 1960 ވަނަ އަހަރުން ފެށިގެން ކިއުބާގައި މިދުވަސް ފާހަގަކުރަން ފަށާފައި ވަނީ، އަވަހާރަވި ކިއުބާގެ ކުރީގެ ރައީސް ފިޑެލް ކާސްޓްރޯ އިސްވެ ހުންނަވާ ގެންނެވި އިންގިލާބުގެ ކާމިޔާބީތައް ފާހަގަކުރެއްވުމުންނެވެ.

ކިއުބާގެ އިންޤިލާބީ ދުވަސް ފާހަގަ ކުރުމުގެ ގޮތުން ކޮންމެ އަހަރަކުވެސް އެޤައުމުގައި އަސްކަރީ ހެވިކަމާއި ކުޅިވަރުގެ ހަރަކާތްތައް ވަރަށް ކުލަގަދަކޮށް ބާއްވައެވެ.

ކާސްޓްރޯ އިސްވެ ހުންނަވައި، އަސްކަރީ އިންޤިލާބަކުން، ކިއުބާގެ ވެރިކަން ބަދަލުކޮށްލެއްވީ، އޭރު ކިއުބާގެ ވެރިކަމަށް ބަޣާވާތަކުން ވަޑައިގެންނެވުމަށްފަހު ވެރިކަމުގައި ދެމި ހުންނެވި، ފުލްގެންސިއޭ ބަޓިސްޓާގެ ވެރިކަން 31 ޑިސެމްބަރު 1958ގައި ނިމުމަކަށް ގެންނަވައިގެންނެވެ. އޭނާ ޤައުމުދޫކޮށް ފިއްލެވީ، އޭނާގެ ވެރިކަމުގައި ހިނގަމުން ދިޔަ ކޮރަޕްޝަނާއި ފަސާދައިގެ އަމަލުތަކާއި ގޭންގުކުށްތަކާއި ބޭއިންސާފާއި ދެކޮޅަށް ނުކުތް ފަރާތްތަކުގެ އުތުރިއެރުންތަކާއި ގުޅިގެން ވެރިކަން ނުދެމެހެއްޓޭނެކަން ޔަޤީން ވުމުންނެވެ. 

ކިއުބާގެ އިންޤިލާބީ ލީޑަރު ފިޑެލް ކާސްޓްރޯ 1965 އިން 2011އަށް 46 އަހަރު ކިއުބާގެ ރައީސް ކަމުގެ މަޤާމުގައި ދެމިހުންނެވިއެވެ.

ދިވެހިރާއްޖެއިން ކިއުބާއާއި އެކު ސިޔާސީ ގުޅުން ގާއިމުކޮށްފައި ވަނީ 1977 ވަނަ އަހަރުގެ ޖެނުއަރީ މަހުގެ 29 ވަނަ ދުވަހުގައެވެ.