Advertisement
ރައީސުލްޖުމްހޫރިއްޔާ ފެންބޮޑުވި ސަރަހައްދުތަކަށް ކުރެއްވި ޒިޔާރަތުގެ ތެރެއިން ---
ވިއްސާރައިގައި ލިބުނު ގެއްލުންތައް ރައީސް ބައްލަވާލައްވައިފި
މާލެ ސަރަހައްދަށް ބޯކޮށް ވާރޭވެހި ފެންބޮޑުވެ ލިބުނު ގެއްލުންތައް ބައްލަވާލެއްވުމަށް ރައީސުލްޖުމްހޫރިއްޔާ ޑ. މުޙައްމަދު މުޢިއްޒު މާލޭގެ ބައެއް ގޭގެއަށް ޒިޔާރަތްކުރައްވައިފިއެވެ.
މާލޭގައި ފެންބޮޑުވި ސަރަހައްދުތަކަށާއި، ގެއްލުނުން ލިބުނު ގެތަކަށް ރައީސުލްޖުމްހޫރިއްޔާ ކުރެއްވި ޒިޔާރަތުގައި އެމަނިކުފާނުގެ އަރިހުގައި ރައީސުލްޖުމްހޫރިއްޔާގެ ނައިބު އަލްއުސްތާޛު ޙުސައިން މުޙައްމަދު ލަޠީފާއި، ޑިފެންސް މިނިސްޓަރ ޣައްސާނު މައުމޫނާއި، ލޯކަލް ގަވަރމަންޓް މިނިސްޓަރ އާދަމް ޝަރީފް އުމަރުވެސް ބައިވެރިވެވަޑައިގެންނެވިއެވެ.
ފެންބޮޑުވުމުގެ ސަބަބުން ގެއްލުން ލިބުނު ގެތަކަށް ރައީސުލްޖުމްހޫރިއްޔާ ކުރެއްވި ޒިޔާރަތުގައި ވަނީ، އެގެތަކަށް ލިބުނު ގެއްލުންތައް ބައްލަވާައްވައި، އެގޭގޭގައި ދިރިއުޅޭ މީހުންގެ ހާލުއަހުވާލު އޮޅުންފިލުއްވާފައެވެ. އަދި އެކަމާއި ގުޅިގެން ސަރުކާރުން ފޯރުކޮށްދެއްވެން އޮތް އެހީތެރިކަމެއް ފޯރުކޮށްދެއްވާނެ ކަމުގެ ޔަޤީންކަންވެސް އެމަނިކުފާނު ވަނީ ދެއްވާފައެވެ.
މީގެ އިތުރުން މާލެއަށް ދިމާވާ ފެންބޮޑުވުމުގެ މައްސަލަ ހައްލުކުރެއްވުމަށް ސަރުކާރުން އެކަށީގެންވާ ފިޔަވަޅުތަކެއް އަޅުއްވާނެ ކަމުގައިވެސް އެމަނިކުފާނު ވިދާޅުވިއެވެ.
ރެއިން ފެށިގެން މާލެއަށް ބޯކޮށް ވާރޭ ވެހުމުގެ ސަބަބުން މުޅި މާލޭގައި ފެންބޮޑުވެ އާއްމު ދަތުރުފަތުރަށްވެސް ހުރަސްއެޅިގެން ދިޔައެވެ.
މާލޭގެ މަގުތަކުގައި ބޮޑުވެފައިވާ ފެންގަނޑު ހިންދުމުގެ މަސައްކަތް ކޮށްފައިވަނީ ސިފައިންނާއި ފުލުހުންނެވެ.
