2024 ޖެނުއަރީ 31 ގައި ބޭއްވުމަށް ކުރިން ތައްޔާރުވަމުން ދިޔަ ނަމަވެސް، ކޮމިޝަނަރ އޮފް ސްޕޯޓްސް، މުޙައްމަދު ޠަލާލުގެ އެންގުމަށް މިހާރު މަޑުޖައްސާލާފައިވާ، ފުޓުބޯޅަ އެސޯސިއޭޝަން އޮފް ދަ މޯލްޑިވްސް (އެފްއޭއެމް) ގެ އިންތިހާބުގައި ވާދަކުރުމަށް އެދި، ކްލަބް އީގަލްސްގެ ސީއީއޯ އަދި މި ދައުރުގެ އެފްއޭއެމްގެ ރައީސް، ބައްސާމް އަދީލް ޖަލީލުގެ އެކްސްކޯ މެންބަރު، މުފާވިޒު ހާޝިމު (މުފާ) ހުށަހަޅާފައިވާ ވެލެންސިއާގެ ތާއީދު ސިޓީއާ ގުޅިގެން، މި އިންތިހާބުގައި ދެން ވާދަކުރާ ރައްޔިތުންގެ މަޖިލީހުގެ މަހިބަދޫ ދާއިރާގެ މެމްބަރު، އަހްމަދު ޠާރިގު (ޓޮމް)، ސީރިއަސް ތުހުމަތުތަކެއް ކުރައްވައިފިއެވެ.

ސޯޝަލް މީޑިއާގައި އަހްމަދު ޠާރިގު (ޓޮމް) ހިއްސާކޮށްފައިވާ ޕޯސްޓުގެ ސްކްރީން ޝޮޓެއް

ސޯޝަލް މީޑީއާގައި ޓޮމް ހިއްސާކުރައްވާފައިވާ ގޮތުގައި، އެފްއޭއެމްގެ އިންތިހާބުގައި ވާދަކުރުމަށް، މުފާ ހުށަހަޅުއްވާފައިވާ ކްލަބް ވެލެންސިއާގެ ތާއީދު ސިޓީއަކީ ފޯޖުކޮށްފައިވާ ސިޓީއެކެވެ. އެހެންކަމުން، ކްލަބް ވެލެންސިއާއިން އެންޑޯޒްކޮށްފައިވާ ކެނޑިޑޭޓު ސާފުކޮށްދިނުމަށް، އެފްއޭއެމްގެ އިލެކްޓޯރަލް ކޮމިޓީއަށް ކްލަބް ވެލެންސިއާއިން މިއަދު ވަނީ ސިޓީއެއް ފޮނުވާފައެވެ.

މީގެ އިތުރުން، ފުޓުބޯޅަ އެސޯސިއޭޝަނަށް އަރާފައިވާ ވިގަނީގެ ކަންކަން ނުނިމެނީސް މި މަސައްކަތް ހުއްޓާނުލާނެކަމަށް ވެސް، އެ ޕޯސްޓުގައި ޓޮމް ވިދާޅުވެފައިވެއެވެ.

ކްލަބް ވެލެންސިއާއިން އެފްއޭއެމްގެ އިލެކްޓޯރަލް ކޮމެޓީއަށް ފޮނުވި ސިޓީގައިވާގޮތުން، އެފްއޭއެމްގެ ރައީސަކަށް ގެނައުމަށް އެ ކްލަބުން ތާއީދުކުރަނީ ޓޮމް އަށެވެ. އަދި އެ ކްލަބުން މި ގޮތަށް ނިންމީ، މި މަގާމަށް އެންމެ ގާބިލް ބޭފުޅަކީ ޓޮމްކަމަށްވެފައި، ފުޓުބޯޅަ ކުރިއެރުވުމަށް އެކަށޭނަ މަސައްކަތްތަކެއް ކުރެވޭނެ ބޭފުޅަކީ ވެސް ޓޮމްކަމަށް އެ ކްލަބުން ގަބޫލު ކުރާތީ ކަމުގައި އެ ސިޓީގައި ވެއެވެ.

އަދި ކްލަބުގެ ޗެއާމަން އަބްދުﷲ އަޒްމީން ސޮއިކޮށް ފޮނުވާފައިވާ މި ސިޓީއަކީ ސީދާ ކްލަބުގެ ނިންމުންކަން ހާމަ ކުރުމުގެ ގޮތުން، އަޒްމީންއަކީ ކްލަބުގެ ޗެއާމަންކަމަށް ޔަގީންކޮށްދިނުމަށް، ކޮމިޝަނަރ އޮފް ސްޕޯޓްސް ދީފައިވާ ލިޔުމެއް ވެސް އެފްއޭއެމްގެ އިލެކްޓޯރަލް ކޮމިޓީއަށް ހުށަހަޅާފައިވެއެވެ.

އެފްއޭއެމްގެ ރައީސްކަމަށް ކުރިމަތިލާން ކެންޑިޑެސީ ހުށަހަޅާއިރު، ފުރަތަމަ ޑިވިޝަނުގެ ތިން ޓީމެއްގެ ތާއީދު އޮތްކަން ކަށަވަރުކުރަން ޖެހެއެވެ. އެގޮތުން މި އިންތިހާބަށް ކުރިމަތިލާފައިވާ ދެ ކެނޑިޑޭޓުން ވެސް، ވެލެންސިއާގެ ތާއީދު ސިޓީ ވަނީ ހުށަހަޅާފައެވެ.