އިންގްލިޝް ޕްރިމިއަ ލީގުގައި ހޮނިހިރު ދުވަހުގެރޭ ނޮޓިންހަމް ފޮރެސްޓް އަތުން 2-1 އިން މެންޗެސްޓަރ ޔުނައިޓެޑް ބަލިވެ، އެ ޓީމަށް މި އަހަރު ނިންމާލަން ޖެހުނީ ދަނޑުމަތީގައި ކާމިޔާބާ ބީރަށްޓެހި ބައެއްގެ ގޮތުގައެވެ.

ޔުނައިޓެޑުން އެންމެ ފަހުން ކުޅުނު މެޗުގައި، މި ސީޒަނުގައި މޮޅު ކުޅުމެއް ދައްކަމުން އަންނަ އެސްޓަން ވިލާ ބަލިކުރުމުން، ޓީމަށް ކުރިމަތިވެފައިވާ އުނދަގޫ ދުވަސްތަކާއި މަޑުމަޑުން ދުރަށް ދެވެން އުޅޭ ކަމުގެ އިހްސާސްތަކެއް އެ ޓީމުގެ ކުޅުންތެރިންނަށާއި ސަޕޯޓަރުންނަށް ކުރުވި ކަހަލައެވެ. ނަމަވެސް އިދިކޮޅު ޓީމުގެ ގޯލު ކުރިމަތީގައި ރަގަޅު ކުޅުމެއް ނުދެއްކި، ޔުނައިޓެޑަށް އަހަރު ނިންމާލަން މި ޖެހުނީ އަނެއްކާ ވެސް ބައްޔަކުންނެވެ.

މި ސީޒަނުގައި ޔުނައިޓެޑު ކުޅުނު 20 މެޗުގެ ތެރެއިން މިހާރު 9 މެޗުން ބަލިވެފައިވާއިރު، މިދިޔަ ސީޒަން އެއްކޮށް ކުޅެ ގެއްލުނު މެޗުތަކުގެ އަދަދާއި މިހާރު މިވަނީ އެއްވަރުވެފައެވެ. އެ ޓީމުގެ ފަރާތުން މިހާ ދަށް ނަތީޖާތަކެއް އެންމެ ފަހުން ފެނިގެން ގޮސްފައިވަނީ މީގެ 35 އަހަރު ކުރިން، 1989/90 ސީޒަންގައެވެ.

Advertisement

ރޭގެ މެޗުގައި ފުރަތަމަ ލީޑު ނެގީ ފޮރެސްޓުންނެވެ. އެ ޓީމުގެ ގޯލު ކާމިޔާބު ކޮށްދިނީ މެޗުގެ 64 ވަނަ މިނެޓުގައި ރޮޑްރިގޭޒްއެވެ. ޔުނައިޓުން ނަތީޖާ ހަމަހަމަ ކުރީ ފޮރެސްޓުގެ ކީޕަރަށް ހެނދުނު މިސްޓޭކެއްގެ ބޭނުން ހިފައި، ރަޝްފޯޑެވެ. އެއީ މެޗުގެ 78 ވަނަ މިނެޓުގައެވެ.

މެޗުން މޮޅުކޮށްދިން ގޯލު ފޮރެސްޓަށް ކާމިޔާބު ކޮށްދިނީ މެޗު ނިމެން ކުޑަތަންވެފައި ވަނިކޮށް، 82 ވަނަ މިނެޓުގައި ޔުނައިޓެޑުގެ ޖާޒީގައި ކުރިން ކުޅުނު އެލާނގާ ކުރި ހުރަހަކުން، ގިބްސް-ވައިޓްއެވެ. މިއީ 1992 ވަނަ އަހަރަށްފަހު، ފޮރެސްޓުން ޔުނައިޓެޑުގެ މައްޗަށް ހޯދި ފުރަތަމަ ކާމިޔާބީއެވެ.