ރައްޓެހިންތަކަކާއިއެކު، އައްޑޫސިޓީ ގަމުގެ ފަރުމައްޗަށް އިހިނަގަން ގޮސް އުޅެނިކޮށް ގެއްލުނު 18 އަހަރުގެ ޒުވާނާ ހޯދުމުގެ މަސައްކަތް ހުއްޓާނުލާ ކަމުގައި އެމްއެންޑީއެފުން ވިދާޅުވެއްޖެއެވެ.

އެމްއެންޑީއެފުން ވިދާޅުވީ، ނައީޝް ހޯދުމުގެ މަސައްކަތް އަދިވެސް ސިފައިން ކުރަމުންދާ ކަމަށާއި އެމަސައްކަތް މުޅިން ހުއްޓާނުލާ ކަމަށެވެ. އެހެން ނަމަވެސް މިހާތަނަށް ކުރެވުނު މަސައްކަތުން ގެއްލުނު ޒުވާނާގެ އެއްވެސް ހިލަމެއް ވެފައެއް ނުވެއެވެ.

 ސ.މަރަދޫ ކުރެދުމާގޭ މުޙައްމަދު ނައީޝް (18އ) ގެއްލުނު ކަމަށް ރިޕޯޓުކޮށްފައި ވަނީ، ޑިސެމްބަރު މަހުގެ 21 ވަނަ ދުވަހުގެ ރޭ 22:10ހާއިރުގައި ކަމަށް އެންއެމްޑީއެފުން ބުނެފައިވެއެވެ. ނައީޝްގެ އެކުވެރިން ކިޔައިދީފައިވާ ގޮތުގައި ނައީސް ގެއްލުނީ، ރާޅެއްގައި އޮޔާ ދަމައިގަތުމުގެ ސަބަބުންނެވެ. 

ނައީޝް ގެއްލުނުތާ މިއަދަށް 10 ދުވަސްވެފައި ވާއިރު، އޭނާ ދިރިހުއްޓައި ފެނިދާނެކަމުގެ އުއްމީދު ވަނީ ކުޑަވެފައެވެ. އޭނާ ހޯދުމަށް ޑައިވްކޮށްގެންނާއި ކަނޑާއި ވައިގެ މަގުންވެސް ބޮޑު ސަރަހައްދެއް ސިފައިން ވަނީ ބަލާފައެވެ. އެހެން ނަމަވެސް ކަނޑުމަތިން މީހުން ހޯދުމުގެ މަސައްކަތަށް ޤާބިލް އިންޑިއާއިން ރާއްޖެއަށް ހަދިޔާކޮށްފައިވާ ޑޯނިއާ މަތިންދާބޯޓު ސާރޗް އެންޑް ރެސްކިއު އޮޕަރޭޝަންގައި ބޭނުންކޮށްފައި ނުވާތީ، ސަރުކާރަށް ވަނީ ފާޑުކިޔުންތައްވެސް އަމާޒުވެފައެވެ.