ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވަޒީރުންގެ މަޖިލީހަށް ޢައްޔަނުކުރައްވާފައިވާ ހުރިހާ މެމްބަރުންނަށް ރުހުންދިނުމާއި ގުޅޭ ގޮތުން ދައުރުން ބޭރުގައި ރައްޔިތުންގެ މަޖިލީހުގެ ޖަލްސާއެއް ބޭއްވުމަށް މަސައްކަތް ކުރާނެ ކަމުގައި އެމްޑީޕީން ބުނެފިއެވެ.

އެމްޑީޕީގެ މަޖިލިސް މެމްބަރުން ބޭއްވި ނޫސްވެރިންގެ ބައްދަލުވުމުގައި، ރައްޔިތުންގެ މަޖިލީހުގެ ނައިބު ރައީސް، އަދި އެމްޑީޕީގެ ޕާލަމެންޓްރީ ގުރޫޕްގައި ހިމެނިވަޑައި ގަންނަވާ ހޯރަފުށީ ދާއިރާގެ މެމްބަރު އަޙްމަދު ސަލީމް ވިދާޅުވީ، ވަޒީރުންނަށް ރުހުންދިނުމަށް ދައުރުން ބޭރުގައި ޖަލްސާއެއް ބޭއްވުމަށް އެމްޑީޕީގެ ޕާލަމެންޓްރީ ގުރޫޕްގެ މެމްބަރުންގެ ފުރިހަމަ އެއްބާރުލުން ދޭނެކަމަށެވެ. އަދި މިއަދުވެސް ދައުރުން ބޭރުން ޖަލްސާއެއް ބޭއްވުމަށް އެކަމާއި ގުޅޭ މަޝްވަރާތައް ކުރެވުނު ކަމުގައި ސަލީމް ވިދާޅުވިއެވެ.

މިބައްދަލުވުމުގައި އެމްޑީޕީގެ ޕާލަމެންޓްރީ ގުރޫޕްގައި ހިމެނިވަޑައިގަންނަވާ ހުޅުމާލެ ދާއިރާގެ މެމްބަރު ޢަލީ ނިޔާޒު ވިދާޅުވީ، ދައުރުން ބޭރުގައި ޖަލްސާއެއް ބޭއްވުމަށް އެމްޑީޕީގެ ޕާލަމެންޓްރީ ގުރޫޕުގެ ފަރާތުން މިއަދު މަޖިލީހަށް ހުށައެޅުއްވުމާއި ގުޅޭ ގޮތުން މަޝްވަރާކުރައްވައި އެކަން މަޖިލީހަށް ހުށައަޅުއްވާނެ ކަަމަށެވެ.

މިއަދު ބޭއްވި ރައްޔިތުންގެ މަޖިލީހުގެ ސަރުކާރުގެ މަސްއޫލިއްޔަތު އަދާކުރާ މިންވަރު ބަލާކޮމިޓީގެ ބައްދަލުވުމުގައި ވަނީ، ވަޒީރުންގެ މަޖިލީހުގެ މެމްބަރުންނަށް ރުހުންދިނުމަށް މަޖިލީހުންގެ ތަޅުމަށް ހުށައެޅުމަށް ފާސްކޮށްފައެވެ. އަދި ނިންމާފައި ވަނީ މަޖިލީހުގެ ތަޅުމުގައި ކޮންމެ ވަޒީރަކަށް ރުހުން ދިނުމުގައި ވަކިވަކިން ވޯޓަށް އެހުމަށެވެ.