ރައީސުލްޖުމްހޫރިއްޔާ އާއި އެމަނިކުފާނުގެ ނައިބު ޢަޒުލުކުރުމަށް މިހާތަނަށް އެމްޑީޕީން އެއްވެސް މަސައްކަތެއްކޮށްފައި ނުވާނެކަމުގައި އެޕާޓީން ބުނެފިއެވެ.

އެމްޑީޕީގެ ޕާލަމެންޓްރީ ގުރޫޕުން މަޖިލީހުގެ އިދާރާގައި މިއަދު ބޭއްވި ނޫސްވެރިންގެ ބައްދަލުވުމުގައި، ރައްޔިތުންގެ މަޖިލީހުގެ ނައިބު ރައީސް، އަދި އެމްޑީޕީގެ ޕާލަމެންޓްރީ ގުރޫޕްގައި ހިމެނިވަޑައި ގަންނަވާ ހޯރަފުށީ ދާއިރާގެ މެމްބަރު އަޙްމަދު ސަލީމް ވިދާޅުވީ، ރައީސުލްޖުމްހޫރިއްޔާ އާއި އެމަނިކުފާނުގެ ނައިބު މަޤާމުން ޢަޒުލްކުރުމާއި ގުޅޭ ގޮތުން އެމްޑީޕީގެ ޕާލަމެންޓްރީ ގުރޫޕުގައި އެއްވެސް މަޝްވަރާއެއްވެސް ކޮށްފައި ނެތްކަމުގައި ސަލީމް ވިދާޅުވިއެވެ. މީގެ އިތުރުން އެމްޑީޕީންވެސް އެަފަދަ އިޝާރާތެއް ކޮށްފައި ނެތްކަމުގައި ސަލީމް ވިދާޅުވިއެވެ.

ސަލީމް ވިދާޅުވީ، ރައީސުލްޖުމްހޫރިއްޔާ އާއި އެމަނިކުފާނުގެ ނައިބު މަޤާމުން ޢަޒުލްކުރެއްވުމާއި ގުޅޭ ގޮތުން ވަކިވަކި ބައެއް މެމްބަރުން ޚިޔާލުފާޅު ކުރެއްވި ނަމަވެސް އެއީ ޕާޓީގެ އަދި ޕާލަމެންޓްރޫ ގްރޫޕުގެ ނިންމުމެއް ނޫންކަމަށާއި، އެގޮތަށް ޚިޔާލު ފާޅުކުރެއްވި ބައެއް މެމްބަރުން، ބުރާސްފަތި ދުވަހުގެ ތެރޭ ޕީއެންސީއާ ގުޅިވަޑައިގެންނެވި މަންޒަރުވެސް ފެނިވަޑައިގަންނަވާނެ ކަމަށެވެ.

ރައީސުލްޖުމްހޫރިއްޔާ އާއި އެމަނިކުފާނުގެ ނައިބު ޢަޒުލުކުރަން އުޅޭ ކަމުގެ އަޑުތައް ފެތުރުނީ، މަޖިލީހުގެ ޤަވާއިދަށް އެމްޑީޕީގެ މެޖޯރިޓީ އޮތް މަޖިލީހުން ގެނައި ބަދަލާއިއެކު ރައީސުލްޖުމްހޫރިއްޔާ އާއި އެމަނިކުފާނުގެ ނައިބު ޢަޒުލުކުރެވޭނެ މަގު ފަހިވެ އެމްޑީޕީއަށް އެކަނި އެއަދަދަށް ވޯޓު ހަމަވާގޮތަށް ބަދަލުވެގެން ދިޔުމުންނެވެ.