އިންޑިއާގެ ޓްރިވަންޑްރަމް އިންޓަނޭޝަނަލް އެއާޕޯޓުން ޖެނުއަރީ 1، 2024 ފެށިގެން ސައިލެންޓް އެއަރޕޯޓަކަށް ބަދަލުކުރުމަށް ނިންމައިފިއެވެ.  މި ނިންމުމާއިއެކު 1 ޖަނަވަރީން ފެށިގެން އެ އެއަރޕޯޓްގައި ދެން ބޯޑިންއަށް އިއުލާނެއް ނުކުރާނެއެވެ. 

އޭރުން މުޅި އެއާޕޯޓުން ވަރަށް ބޮޑަށް ހިމޭންކަން އިހްސާސް ވާނެވެ. ޓްރިވެންޑްރަމް އެއާޕޯޓް "ސައިލެންޓު އެއާޕޯޓަކަށް" ބަދަލު ކުރުމުގެ ބޭނުމަކީ ޕަސެންޖަރުންނަށް އުނދަގުލަކާ ނުލައި އެއާޕޯޓު ބޭނުންކުރުމުގެ ފުރުސަތު ފަހިކޮށްދީ، ހިމޭންކަމުގެ ފަސޭހަކަން އިހްސާސްކޮށް ދިނުން ކަމަށް ޓްރިވަންޑްރަމް އެއާޕޯޓުގެ ތަރުޖަމާނު ވިދާޅުވިއެވެ.

ސައިލެންޓު އެއާޕޯޓަކަށް ބަދަލު ކުރިޔަސް، ޕަސެންޖަރުންނަށް ބޭނުންވާ މުހިއްމު މައުލޫމާތު އެއާޕޯޓުން ފެންނަން ހުންނާނެއެވެ. ޖެނުއަރީ 1 އިން ފެށިގެން އެއާޕޯޓުން އިއުލާނު ކުރާނީ ސެކިއުރިޓީ އަދި އެމަޖެންސީ އެނައުންސްމެންޓާއި ބޯޑިން ގޭޓު ބަދަލުވުން ފަދަ މުހިއްމު އިއުލާނުތަކެވެ.

ޓްރިވަންޑްރަމްއަކީ ދިވެހިން އެންމެ ގިނައިން ޒިޔާރަތްކުރާ އެއް އެއަފޕޯޓެވެ. ބޭސްފަރުވާއާއި އެހެނިހެން ބޭނުންތަކަށްވެސް ގިނަ އަދަދެއްގެ ދިވެހިން މި އެއަރޕޯޓަށް ޒިޔާރަތްކުރެއެވެ.