Advertisement
ޓްރާންސްފޯމަރ ނަގާފައި. ފޮޓޯ: ސްޓެލްކޯ
މާވެޔޮ މިސްކިތް ކައިރީގައި ހުރި ސްޓެލްކޯގެ ޓްރާންސްފޯމަރ ނަގައިފި
މާވެޔޮ މިސްކިތް ކައިރީ ހުރި ސްޓެލްކޯގެ ޓްރާންސްފޯމަރު ނަގައިފިއެވެ. މިތަން ހުރީ މިސްކިތް ކައިރީ މަގުމައްޗަށްވާގޮތަށެވެ.
މި ޓްރާންސްފޯމަރު އެތަނުން ނަގާފައިވަނީ އެ ސަރަޙައްދުގެ މަގުމަތި ބޭނުންކުރާ ފަރާތްތަކުގެ ރައްކާތެރިކަމާއި ފަސޭހައަށްކަމަށް އެކުންފުނިން ބުނެއެވެ.މި ޓްރާންސްފޯމަރު ނެގުމުގެ މަސައްކަތް ސްޓެލްކޯއިން ފަށާފައިވަނީ މިދިޔަ ނޮވެމްބަރު މަހުގެ ފަހުކޮޅުގައެވެ.
މިއީ އެކުންފުނީގެ އައު މެނޭޖިންގ ޑިރެކްޓަރ ޙުސައިން ފަހުމީ، މަޤާމާ ޙަވާލުވެވަޑައިގެން އެންމެ ފުރަތަމަ ފެށްޓެވި މަސައްކަތެވެ. މަޤާމާ ޙަވާލުވެވަޑައިގެން ފުރަތަމަ ދުވަހު ފަހުމީ ވަނީ އެ ސަރަޙައްދަށްގޮސް، ރައްޔިތުންނަށް ތަކުލީފަކަށްވެފައިވާ މާވެޔޮ މިސްކިތް ހުންނަ ސަރަހައްދުގައި މަގުމަތީގައި ބަހައްޓާފައިވާ ޓްރާންސްފޯމަރު މި އަހަރު ނިމުމުގެ ކުރިން ނަގާނެކަމުގެ ޔަޤީންކަންދެއްވާފައެވެ.
Advertisement
މި މަސައްކަތް ފުރިހަމަކުރެވުމާގުޅިގެން ސޯޝަލް މީޑިއާގައި ކުރެއްވި ޕޯސްޓެއްގައި ސްޓެލްކޯގެ މެނޭޖިންގ ޑިރެކްޓަރ ޙުސައިން ފަހުމީ ވިދާޅުވީ، އައު އަހަރު އެއްވެސް ހުރަހެއްނެތި އެމަގުން ރައްޔިތުންނަށް ދަތުރު ކުރެވި އޭގެ ފަސޭހަ ލިބިގެންދާނެކަމަށެވެ.
މިޓްރާންސްފޯމަރަކީ އެ ސަރަޙައްދާއި، އެމަގު ބޭނުން ކުރާ ރައްޔިތުންނަށް ވަރަށް ބޮޑު ތަކުލީފަކަށްވެފައިވާ ޓްރާންސްފޯމަރެއްކަމަށް ސްޓެލްކޯއިން ބުނެއެވެ. މާވެޔޮ މިސްކިތް ކައިރީ މަގުމައްޗަށް ވާގޮތަށް މިޓްރާންސްފޯމަރު ހުންނަތާ 6 އަހަރެއްހާ ދުވަސް ވަނީ ވެފައެވެ.
