އެމް.ޑީ.ޕީ އަކީ ރާއްޖޭގައި ޑިމޮކްރެސީގެ ހަމަތަކާއި އުސޫލުތައް ވަރުގަދަ ކުރަން އަބަދުވެސް މަސައްކަތް ކުރާ ޕާޓީކަމުގައި އެމްޑީޕީގެ ޕާލަމެންޓްރީ ގްރޫޕުގެ ލީޑަރު އަދި ރައްޔިތުންގެ މަޖިލީހުގެ އަލިފުށި ދާއިރާގެ މެމްބަރު މުހައްމަދު ރަޝީދު ހުސައިން (ބިގޭ) ވިދާޅުވެއްޖެއެވެ.

އެމްޑީޕީގެ 13 މެމްބަރަކު އެމްޑީޕީ ދޫކޮށް ޕީއެންސީއަށް ސޮއެކުރެއްވުމާއި ގުޅުވައި އޭނާ އެކްސްގައި ކުރެއްވި ޕޯސްޓްގައި ވިދާޅުވީ، އެމް.ޑީ.ޕީ އަކީ ރާއްޖޭގައި ޑިމޮކްރެސީގެ ހަމަތަކާއި އުސޫލުތައް ވަރުގަދަ ކުރަން އަބަދުވެސް މަސައްކަތް ކުރާ ޕާޓީކަމަށާއިި، ޕާޓީގެ މެމްބަރުން ބުރަ މަސައްކަތްކޮށް ހޮވި ޕާލަމެންޓް މެމްބަރުން އެހެން ޕާޓީ އަކަށް ދިއުން ރަނގަޅު ނޫންކަމަށެވެ.

އަދި އެމް.ޑީ.ޕީ އަކީ ރާއްޖެ އެދޭ ހެޔޮ ބަދަލަށް ވަކާލާތުކޮށް ރައްޔިތުންގެ އުންމީދުތައް ހަގީގަތަކަށް ހެދުމުގެ މަސައްކަތް ކުރާ ޕާޓީކަމަށާއި، އެމް.ޑީ.ޕީގެ މެމްބަރުންނަކީ ސާބިތުކަމާއެކު ގައުމާއި ރައްޔިތުންގެ ކުރިމަގާއި އުންމީދުތައް ހަގީގަތަކަށް ހަދައިދިނުމުގަ މާޔޫސްކަމެއް، ވަރުބަލިކަމެއް ނެތި މަސައްކަތްކުރާ މެންބަރުން ކަމުގައިވެސް އެމްޑީޕީގެ ޕީޖީ ލީޑަރު، މުހައްމަދު ރަޝީދު ހުސައިން ވިދާޅުވިއެވެ.

އެމްޑީޕީގެ 13 މެމްބަރަކު އެޕާޓީ ދޫކޮށް ސަރުކާރު ހިންގާ ޕާޓީ، ޕީއެންސީއާ ގުޅުމާއިއެކު އެމްޑީޕީގެ ލީޑަރޝިޕްއަށް ވަނީ ފާޑުކިޔުންތައް އަމާޒުވެގެން ގޮސްފައެވެ. ޚާއްސަކޮށް، އެމްޑީޕީގައި ރައީސް ނަޝީދު ބޭނުންފުޅުވާ ގޮތަށް ކަންކަން ނުދާންފެށުމުން އެކަމާއި ނުރުހުންވެ އެންމެ ފުރަތަމަ އެމްޑީޕީން ވަކިވެވަޑައިގެންނެވި 13 މެމްބަރުންނާއި އެމެމްބަރުން ނިސްބަތްވާ ޕާޓީ ދަ ޑިމޮކްރެޓްސްއިން ދަނީ އެކަމަށް ފާޑުކިޔަމުންނެެވެ. ޕީއެންސީއަށް އެމްޑީޕީގެ 13 މެމްބަރަކު ސޮއެކުރެއްވުމާއި އެކު ރައްޔިތުންގެ މަޖިލީހުގެ މައިނޯރިޓީގެ މަޤާމު ދަ ޑިމޮކްރެޓްސްއަށް ވަނީ ގެއްލިފައެވެ.