މިހާރު ރާއްޖެއަށް ކުރަމުންދާ ވިއްސާރައިގަ ޅ. ހިންނަވަރު ގެއެއްގެ ފުރާޅު އެއްލާލައިފިއެވެ. 

“ނޫން” އަށް މައުލޫމާތު ލިބިފައިވާ ގޮތުގައި ފުރާޅު އެއްލާލާފައިވަނީ އެ ރަށު މެދުހުރަސް މަގުގައި ހުންނަ “މާރަނގަ” ނަމަކަށް ކިޔާ ގޭގެއެވެ. އަދި މި ހާދިސާއާ ގުޅިގެން އެއްވެސް މީހަކަށް އަނިޔާއެއް ލިބިފައެއް ނުވެއެވެ.

އެ ރަށުން މައުލޫމާތު ދިން މީހަކު ބުނި ގޮތުގައި، އެ ގޭގެ ފުރާޅު އެއްލާލާފައިވަނީ މިއަދު މެންދުރުކުރިން އައި ވަރުގަދަ ކޮޅިގަނޑެއްގައެވެ. އަދި މި ފުރާޅަކީ އެ ގޭގެ ސިޑިގޮޅިމަތީގައި އަޅާފައިވާ ކޮންކްރީޓް ޝީޓުގެ މަތިން ފެން ހެދުން ހުއްޓުވުމަށް އަޅާފައިވާ ކުޑަ ފުރާޅެއްކަމުން، މި ފުރާޅު ވަޔާ އެއްލާލުމަކުން ގޭތެރެއަށް އޭގެ އެއްވެސް އަސަރެއް ނުކުރާކަމަށް މައުލޫމާތު ލިބިފައިވެއެވެ.

މިހާރު ރާއްޖެއަށް ކުރަމުންދާ ވިއްސާރައާ ގުޅިގެން މޯލްޑިވްސް މީޓިއޮރޮލޮޖިކަލް ސަރވިސްއިން ވަނީ ކަނޑުދަތުރުކުރުމުގައި ސަމާލުވުމަށް އެދިފައެވެ. އަދި މިއަދުގެ 2:00 އިން މިރޭގެ 8:00 އާ ހަމައަށް، ހއ އަތޮޅުން ފެށިގެން ވ އަތޮޅާ ހަމައަށް “ވައިޓް އެލާޓް” ވެސް ވަނީ ނެރެފައެވެ. މި ވަގުތުތަކުގައި ގަޑިއަކު 22 މޭލާ 27 މޭލާ ދެމެދުގެ ބާރު މިނެއްގައި ވައި ޖެހޭނެ ކަމާއި، ކޮޅިގަނޑުގައި 45 މޭލަށް ވައި ގަދަވާނެކަމަށް މޯލްޑިވްސް މީޓިއޮރޮލޮޖިކަލް ސަރވިސްއިން އަންގާފައިވެއެވެ.