ވެލާނާ އިންޓަރނޭޝަނަލް އެއަރޕޯޓަށް އަންނަ ޖެޓްތައް ޕާކުކުރުމަށް ޖާގަ އިތުރުކޮށްފިއެވެ. ކޮންމެ އަހަރެއްގެ ފިނި މޫސުމާއި އަދި އައު އަހަރާއި ދިމާކޮށް ވީއައިއޭއަށް ގިނަ އަދަދެއްގެ ޖެޓްތައް އާދެއެވެ. އެމްއޭސީއެލްއިން ބުނީ ޖެޓްތައް ޕާކުކުރެވޭ ޖާގަ އިތުރުކޮށް މި އަހަރުގެ ފިނި މޫސުމުގެ ޗުއްޓީއަށް ވީއައިއޭ ތައްޔާރުވެފައިވާކަމަށެވެ.

އައު އަހަރު ފެށެން ދެތިން ދުވަހަށް ވެފައިވާއިެު މިހާރުވެސް ވެލާނާ އިންޓަރނޭޝަނަލް އެއަރޕޯޓް ވަނީ ޖެޓްތަކުން ފުރާލާފައެވެ. އެމް.އޭ.ސީއެލްއިން ބުނީ މި އަހަރުގެ ފިނި މޫސުމުގެ ސުޕަރ ޕީކް ސީޒަންގެ ޗުއްޓީއަށް ފުރިހަމައަށް ތައްޔާރުވެފައިވާކަމަށެވެ. އަދި އެއަރޕޯޓަށް އަންނަ ޖެޓުތައް ޕާކު ކުރުމަށް ޖާގަ އިތުރުކޮށްފައިވާކަމަށެވެ.

އެގޮތުން ޖުމްލަ 68 ޖެޓު ޕާކު ކުރެވޭނެ ޖާގަ މިހާރު ވީއައިއޭގައި ވަނީ ހަދާފައެވެ. މިއީ އެ އެއަރޕޯޓުގައި ޕްރައިވެޓް ޖެޓު ޕާކު ކުރުމަށް ކަނޑައެޅި ރެކޯޑު ޢަދަދެއްކަމަށްވެސް އެމް.އޭ.ސީ.އެލްއިން ބުނެއެވެ.

Advertisement

މީގެ ކުރިން އެއަރޕޯޓުގައި އެއްފަހަރާ ޕާކު ކުރެވެނީ 39 އެއަރކްރާފްޓަށެވެ. އައު ފިއުލް ފާމު ކުރިމަތިން ޕާކިންގއަށް ތަރައްޤީކުރި ސަރަޙައްދާއި، ހުޅަނގު އުތުރު ސަރަޙައްދުގައި ތަރައްގީ ކުރި ޕާކިންގ ޖާގަތަކާއެކު މި ޢަދަދު ވަނީ 68 އަށް އިތުރުވެފައެވެ.