އިންގްލިޝް ޕްރިމިއަ ލީގުގައި ރޭ ވެސްޓް ހާމް އިން އާސެނަލްގެ މައްޗަށް ކުރި ހޯދައި، ލީގުގެ ތައްޓަށް ވާދަކުރަމުން އަންނަ އާސެނަލްއަށް މާޔޫސްކަން ގެނުވައިފިއެވެ. އާސެނަލްގެ އެމިރޭޓްސް ސްޓޭޑިއަމްގައި ކުޅުނު މި މެޗު ވެސް ހާމް އިން ކާމިޔާބުކުރީ 2-0 އިންނެވެ.

މި މެޗު ގެއްލުމުން، އާސެނަލްއަށް މިވަނީ ލީގުގެ އެއްވަނައަށް އަނބުރާ ދިއުމަށް ލިބުނު ފުރުސަތު ގެއްލިފައެވެ. އަދި މިއީ މި ސީޒަންގައި އެ ޓީމުގެ އަމިއްލަ ދަނޑުގައި ކުޅުނު 10 މެޗުގެ ތެރެއިން ބަލިވި ފުރަތަމަ މެޗު ވެސް މެއެވެ.  

ވެސްޓް ހޭމްގެ ފުރަތަމަ ގޯލު ކާމިޔާބުކޮށްދިނީ މެޗުގެ ފުރަތަމަ ހާފުގައި އެ ޓީމުގެ މިޑްފީލްޑަރު ތޯމަސް ސޯޗެކްއެވެ. މިއީ މި ސީޒަނުގައި އޭނާ ކާމިޔާބުކުރި 5 ވަނަ ލީގު ގޯލެވެ.

އެ ޓީމުގެ ދެވަނަ ގޯލު މެޗުގެ ދެވަނަ ހާފުގައި ކާމިޔާބުކޮށްދިނީ، ކުރިން އާސެނަލްއަށް ވެސް ކުޅެފައިވާ ޑިފެންޑަރ ކޮންސްޓެންޓިނޯސް މެވްރޮޕާނޯސްއެވެ. މިއީ ޖޭމްސް ވާޑް-ޕްރޯސްގެ ކޯނަރަކުން، މެވްރޮޕޯނަސް ބޮލުން ކާމިޔާބުކޮށްދިން ގޯލެކެވެ. އަދި މިއީ ޕްރިމިއަ ލީގުގައި އޭނާ ކާމިޔާބުކުރި ފުރަތަމަ ގޯލުވެސް މެއެވެ.

މި ނަތީޖާއާއެކީ، ލީގު އެއްވަނައިގައި އޮތް ލިވަޕޫލަށް އާސެނަލްއަށް ވުރެން ދެ ޕޮއިންޓް އިތުރަށް ލިބިފައިވެއެވެ. އަދި މެންޗެސްޓަރ ޔުނައިޓެޑުން މި ހަފްތާގައި ފަހަތުން އަރާ އެސްޓަންވިލާ ބަލިކޮށްފައިވުމުން، އިތުރު ޕޮއިންޓެއް ނުލިބި އެސްޓަންވިލާ އޮތީ 39 ޕޮއިންޓާއެކު ލީގުގެ ތިން ވަނައިގައެވެ.