އެމްޑީޕީ ދޫކުރައްވައި، ޕީއެންސީއާ ގުޅިވަޑައިގަތީ، ޤައުމު ހަލަބޮލިވެ ބަނޑަށްޖެހުމުން ސަލާަމަތް ކުރައްބަކަމުގައި، ރައްޔިތުންގެ މަޖިލީހުގެ މަރަދޫ ދާއިރާގެ މެމްބަރު އިބްރާހިމް ޝަރީފް ވިދާޅުވެއްޖެއެވެ.

ޕީއެންސީއަށް ސޮއެކުރައްވައި ރައިސުލްޖުމްހޫރިއްޔާ އާ ފޯމް ހަވާލުކުރެއްވުމަށްފަހު، މިރޭގެ ޖަލްސާގައި ވާހަކަފުޅު ދައްކަވަމުން ޝަރީފް ވިދާޅުވީ، ވެރިކަން ބަދަލުވުމުން ޕީއެންސީއާ ގުޅިވަޑައިގެންނެވުމަށް އޭނާ ހުންނެވީ ވިސްނަވައިގެން ނޫންކަމަށެވެ. އެހެން ނަމަވެސް އޭނާގެ ވިސްނުން ބަދަލުކުރެއްވީ، ރައްޔިތުންގެ މަޖިލީހުގެ ތެރެއިން ވަޒީރުންނަށް ރުހުން ދިނުމުގެ މައްސަލަ ލަސްވަމުން ދިޔުމާއި، ރައީސުލްޖުމްހޫރިއްޔާ އާއި އެމަނިކުފާނުގެ ނައިބު މަޤާމުން ޢަޒުލްކުރުމުގެ ވާހަކަތައް ދެކެވެން ފެށުމުން ކަމުގައި ޝަރީފް ފާހަގަކުރެއްވިއެވެ. ޝަރީފް ވިދާޅުވީ، ރައްޔިތުންގެ ވަރަށް ތަނަވަސް އަޣުލަބިއްޔަތަކުން ވެރިކަމަށް ގެނައި، ބޭފުޅަކު މަޤާމުން ވަކިކުރަން އުޅޭ ގޮތަކީ އޭނާއަށް ޤަބޫކު ކުރެއްވޭ ގޮތެއް ނޫން ކަމަށާއި، އަދި އެކަންކަމުގެ ސަބަބުން ގައުމު ހަލަބޮލިވެގެން ހިނގައިދާނެކަން އޭނާ ފާހަގަކުރެއްވިއެވެ.

ރައްޔިތުންގެ މަޖިލީހުގެ މަރަދޫ ދާއިރާގެ މެމްބަރު ޝަރީފް މީގެ ދެތިން ދުވަސް އެމްޑީޕީގެ މެމްބަރު ކަމުން ވަކިވެވަޑައިގެން ވިދާޅުވީ، އޭނާ ސިޔާސީ ކަންކަމާއި ފެއަށް ޖެހިވަޑައިގެންނެވީ ކަމަށެވެ. އެެހެން ނަމަވެސް މިރޭ ޕީއެންސީއަށް ސޮއެކުރައްވައި ޝަރީފް ވިދާޅުވީ، އެބޭފުޅުން އިސްކުރާނީ ޤައުމީ މަސްލަޙަތު ކަމަށެވެ. އަދި ޕީއެންސީއާ ގުޅިވަޑައިގަތީ އަމިއްލަ މަންފާއަކަށް ނޫންކަމަށާއި، އެއީ ދާއިރާގެ ރައްޔިތުންގެ ހައްޤުގައި ނިންމެވި ނިންމެވުމަށް ކަމުގައި އޭނާ ވިދާޅުވިއެވެ.

މިރޭ ބޭއްވި ޕީއެންސީގެ ޚާއްޞަ ޖަލްސާގައި އެޕާޓީއަށް ސޮއެކުރެއްވި 13 މެމްބަރުންގެ ފަރާތްޕުޅުން ޖަލްސާގައި ވާހަކަފުޅު ދެއްކެވީ މަރަދޫ ދާއިރާގެ މެމްބަރު އިބްރާހިމް ޝަރީފެވެ. އެންމެ ފުރަތަމަ ޑިއާރްޕީގެ ތެރެއިން ސިޔާސީ މަސައްކަތް ފެއްޓެވި ޝަރީފް ޕީއެންސީއާ ގުޅިވަޑައިގެންނެވުމުގެ ކުރިން އެންމެފަހުން ހުންނެވީ އެމްޑީޕީގައެވެ.