އެމްޑީޕީގެ މެޖޯރިޓީއޮތް ރައްޔިތުންގެ މަޖިލީހުން ވަޒީރުންނަށް ރުހުން ނުދީފިއްޔާ އެއްގޮތެއްގައި އެކަން މާރަނގަޅުކަމުގައި، ޕީއެންސީގެ ޗެއަރމަން އަދި ރައީސުލްޖުމްހޫރިއްޔާގެ އެޑްވައިޒަރ ސްޕެޝަލް އެޑްވައިޒަރ ޢަބުދުއްރަހީމް ޢަބުދުﷲ ވިދާޅުވެއްޖެއެވެ.

އޭނާމިހެން ވިދާޅުވީ، މިރޭ ދަރުބާރުގޭ ރަންނަ ބަނޑޭރި މާލަމުގައި ބޭއްވި، ޕީއެންސީގެ ޚާއްޞަ ޖަލްސާގައި، ވަޒީރުންނަށް ރުހުން ނުދީ، މަޖިލިސް ޗުއްޓީއަށް ދިޔުމާއި ގުޅިގެން އެކަމާއި މެދު ނުރުހުންފާޅުކުރައްވައި ދެއްކެވި ވާހަކަފުޅުގައެވެ.

އަބްދުއްރަހީމް ވިދާޅުވީ، ފެހި ޤާނޫނު އަސާސީގެ ދަށުން އުފެދިގެން އައި ކޮންމެ ވެރިކަމެއްގައިވެސް އޭރު އޮތް ރައްޔިތުންގެ މަޖިލީހުން ރުހުން ދިން ކަމަށެވެ. އަދި މިސަރުކާރުގެ ވަޒީރުންނަށް ރުހުން ދިނުން އެމްޑީޕީގެ މެޖޯރިޓީ އޮތް މަޖިލީހުން ފަސްކުރަމުން ދަނީ ކަންކަން ހަޖަމު ނުވެގެން ކަމުގައިވެސް އަބުދުއްރަހީމް ވިދާޅުވިއެވެ. މީގެ އިތުރުން އަބުދުއްރަހީމް ވިދާޅުވީ، ރުހުން ދެންޏާ ދޭންވީ ކަމަށާއި، ރުހުން ނުދިނަސް އެންމެ ރަނގަޅުކަމަށާއި އަދި އެވަރަކުން ރުހުން ހޯއްދަވަން ނުވެސް އުޅުއްވާ ކަމަށެވެ.

އަބުދުއްރަހީމް ވިދާޅުވީ، އެބޭފުޅުން ތިއްބެވީ ރައްޔިތުންނާއިއެކު ކުރިޔަށްދާން ކަމަށެވެ. އަދި ޕީއެންސީގެ ކާމިޔާބީގެ ދަތުރު ޚުލާސާކޮށްދެއްވައި އަބުދުއްރަހީމް ވިދާޅުވީ، 2018އިން 2023އަށް ޕީޕީއެމް ޕީއެންސީ ދަތުރުކުރީ ވަރަށް ގަދަ ކަނޑެއްގައި ކަމަށެވެ. އެހެންނަމަވެސް އެދަތި އުނދަގޫ ހާލަތު ކަޑައްތުކޮށް މިއަދާއި ހަމައަށް އައީ ވަރަށް ވަރުގަދަ އަޒުމަކާއި އެކީގައި ކަމަށް އަބުދުއްރަހީމް ވިދާޅުވިއެވެ.

ރައްޔިތުންގެ މަޖިލީހުން ވަޒީރުންނަށް ރުހުން ދިނުން ލަސްވިކަމުގައި ވީނަމަވެސް، ވަޒީރުންނަށް އެބޭފުޅުންގެ މަސްއޫލިއްޔަތާއި ޒިންމާ އަދާކުރެއްވުމަށް ޤާނޫނީގޮތުން އެއްވެސް ހުރަހެއް ނެތެވެ.