ދެވަނަ ޑިވިޝަން ފުޓުބޯޅަ މުބާރާތުގެ ގްރޫޕް-ސީގެ ފުރަތަމަ މެޗު ވިކްޓްރީ ސްޕޯޓްސް ކްލަބުން ކާމިޔާބުކޮށްފިއެވެ. މިއަދު ހަވީރު ގަލޮޅު ދަނޑުގައި ކުޅުނު މި މެޗުން، ވިކްޓްރީ ތިން ޕޮއިންޓު ހޯދީ، 3-0 އިން ކްލަބް ޕީކޭއާ ބަލިކުރުމަށްފަހުއެވެ.

މެޗު ފެށުމުގެ ކުރިން ދެ ޓީމުން ދަނޑުމަތީގައި އެތުރިލައިގެން ތިބިއިރު، ދެ ޓީމުންވެސް ފެނުނު ގިނަ ކުޅުންތެރިންނަކީ ގަލޮޅު ދަނޑުން މީގެ ކުރިން ވެސް އާދަކޮށް ފެނިފައިވާ ކުޅުންތެރިންނެވެ. މިއަދު ތަފާތުވިކަމަކީ، އެ ކުޅުންތެރިން ކުޅެން ނިކުމެތިބި ޑިވިޝަނެވެ.

ވިކްޓްރީއިން ވަނީ މެޗުގެ ފުރަތަމަ ހާފުގައި ލީޑު ނަގާފައެވެ. މި ގޯލު ކާމިޔާބުކޮށްދިނީ އެ ޓީމުގެ ކިރްގިސްތާންގެ މިޑްފީލްޑަރު އަނަޓޯލީ ވްލަސީޗޭފްއެވެ. މީނާއަކީވެސް މީގެ ކުރިން ރާއްޖޭގެ ފުރަތަމަ ޑިވިޝަނުގެ ޓީމުތަކަށް ކުޅެފައިވާ ކުޅުންތެރިއެކެވެ.

ވިކްޓްރީއިން ލީޑު ފުޅާކުރީ ދެވަނަ ހާފުގައި އެ ޓީމަށް ލިބުނު ޕެނަލްޓީއަކުން ފާރޫކް ހައިދަރޯވްއެވެ. އަދި ފަހު ގޯލު ކާމިޔާބުކޮށްދިނީ ބެލަރޫސް ފޯވާޑް، އިވާން ވެރާސްއެވެ.

މި ނަތީޖާއާއެކީ، ވިކްޓްރީން މުބާރާތް ފަށާފައި މިވަނީ ގްރޫޕްގެ އެއްވަނައިގައެވެ.

ދެވަނަ ޑިވިޝަނުގެ މެޗެއް ދެން އޮންނާނި މިއަންނަ ހޮނިހިރު ދުވަހުއެވެ. އެ މެޗުގައި ބައްދަލުކުރާނީ ޖޭޖޭ ސްޕޯޓްސް ކްލަބާއި ކުޑަހެންވޭރު ޔުނައިޓެޑެވެ.