Advertisement

28 Dec 2023
ކުޅިވަރު

އެފްއޭއެމްގެ ރައީސްކަމަށް ކުރިމަތިލީ ޓޮމް އާއި މުފާ

މި އަންނަ ޖެނުއަރީ މަހުގެ 31 ވަނަ ދުވަހު ބޭއްވުމަށް ހަމަޖެހިފައިވާ، ފުޓުބޯޅަ އެސޯސިއޭޝަން އޮފް ދަ މޯލްޑިވްސް (އެފްއޭއެމް) ގެ ރައީސްކަމަށް އެ އިދާރާގެ ކުރީގެ ރައީސް އަދި ރައްޔިތުންގެ މަޖިލީހުގެ މަހިބަދޫ ދާއިރާގެ މެމްބަރު، އަހްމަދު ތޯރިގު (ޓޮމް) އާއި ކްލަބް އީގަލްސްގެ ސީއީއޯ އަދި މިހާރުގެ ރައީސް ބައްސާމް އަދީލް ޖަލީލުގެ އެކްސްކޯ މެންބަރު މުފާވިޒު ހާޝިމު (މުފާ) ކުރިމަތިލައިފިއެވެ.

މިއީ ޓޮމް މި މަގާމަށް ކުރިމަތިލި ތިން ވަނަ ފަހަރެވެ. އޭނާވަނީ 2016 ވަނަ އަހަރުގެ ޖޫން މަހު ބޭއްވި އިންތިހާބު ކާމިޔާބުކޮށްފައެވެ. އެ ފަހަރު ރައީސްކަމަށް ކުރިމަތިލީ ޓޮމް އެކަންޏެވެ. ފަސް އަހަރަށް އިންތިހާބުވި ނަމަވެސް ޓޮމްއަށް މަގާމުގައި ހުރެވުނީ ތިން މަހާއި ދުވަސްކޮޅެކެވެ.

އެފްއޭއެމްގެ އޭރުގެ ޖެނެރަލް ސެކްރެޓަރީ ބައްސާމް އަދީލް ޖަލީލް މަގާމުން ވަކި ކުރުމުގައި ފުރިހަމަ ކުރަންޖެހޭ ކަންތައްތަކެއް ފުރިހަމަ ނުކޮށް އޭނާ މަގާމުން ވަކިކުރިކަމަށް ބުނެ، ނުވަ މެމްބަރުންގެ މައްޗަށް އެކުލެވޭ އެފްއޭއެމްގެ އޭރުގެ އެކްސްކޯގެ ފަސް މެމްބަރުން އެއްފަހަރާ އިސްތިއުފާ ދިނެވެ. އެހެންކަމުން އެކްސްކޯގެ ގާނޫނީ އަދަދު ހަމަ ނުވާތީ ޓޮމްއަށް މަގާމު ގެއްލުނީއެވެ.

އެއަށްފަހު 2016 ވަނަ އަހަރުގެ ނޮވެމްބަރުގައި އެފްއޭއެމްގެ ރައީސަކު ހޮވުމަށް އަލުން ބޭއްވި އިންތިހާބުގައި ޓޮމް ވާދަކުރިއެވެ. ނަމަވެސް، ޓޮމްގެ މައްޗަށް ކުރި ހޯދައި އެ އިންތިހާބު ކާމިޔާބުކުރީ، ޓޮމްގެ ރައީސްކަމުގައި ޖެނެރަލް ސެކްރެޓަރީކަމުން ވަކިކުރި ބައްސާމްއެވެ.

މި އިންތިހާބުގައި ޓޮމްއާ ވާދަކުރާ މުފާއަކީ ބައްސާމްގެ އެކްސްކޯގައި ހިމެނުނު މަޖިލީހުގެ ހަތަރު މެމްބަރުންގެ މަގާމުތައް ގެއްލުމުން، ބަދަލުގައި އެކްސްކޯއަށް އައްޔަންކުރި މީހުންގެ ތެރޭގައި ހިމެނިގެން ބައްސާމްއާއެކު ފާއިތުވި ދެ އަހަރު އެކްސްކޯގައި މަސައްކަތްކޮށްފައިވާ ފަރާތެކެވެ. އަދި އީގަލްސްއަކީ ވަރުގަދަ ޓީމަކަށް ހެދުމަށް މުފާ އެ ކްލަބާއިއެކު މަސައްކަތްކުރަމުން އަންނަތާ 15 އަހަރު ވެއްޖެއެވެ.

ޓޮމްގެ ޓީމުގައި ހިމެނެނީ ނައިބު ރައީސަކަށް ރާއްޖޭގައި އުފެދުނު އެންމެ މޮޅު އެއް ގޯލްކީޕަރު، އިމްރާން މުހައްމަދު، މާޒިޔާގެ ސީއީއޯ އަދި ބައްސާމްގެ ދެ ވަނަ ދައުރުގެ އެކްސްކޯގައި މަސައްކަތް ކުރި، ހުސައިން ޝާފިއު، މެމްބަރުންގެ ގޮތުގައި، އެފްއޭއެމް އިންޓަރިމް ރައީސް އަހުމަދު ޝާހިރު އަދި އެފްއޭއެމްގެ ކުރީގެ ޖެރެނަލް ސެކްރެޓަރީ، އަބްދުލް ހަމީދު އަބްދުލް ގަފޫރު (އައްޑޯ)އެވެ.

މުފާގެ އެކްސްކޯގެ އެއް ނައިބު ރައީސަކީ މުއާވިޔަތެވެ. ސީނިއާ ނައިބު ރައީސް އަކީ ބުރު ސްޕޯޓްސްގެ މުހައްމަދު އަހްސަންއެވެ. އެކްސްކޯގައި ދެން ހިމެނެނީ ބުރުގެ މެނޭޖަރު އަރުޝަދު އަޝްރަފު، ދެވަނަ ޑިވިޝަނުގައި ވާދަކުރާ ކުޑަ ހެންވޭރު ޓީމު އަދި ކުރީގެ ގައުމީ ޓީމުގެ ފޯވާޑް ހަސަން އަދުހަމް (ސަޑޭ) އާއި ކުރީގެ ޑިފެންޑަރު އަދި ޔުނައިޓެޑް ވިކްޓަރީގެ ރައީސް އިސްމާއީލް ޝަފީއު އާއި ގައުމީ އަންހެން ފުޓްބޯޅަ ޓީމުގެ ކުރީގެ ކުޅުންތެރިޔާ މަރްޔަމް މިރްފަތު އަދި ބުރުގެ މުހައްމަދު ހަސަންއެވެ.

އެފްއޭއެމްގެ އިންތިހާބު އަވަސްކުރުމަށް މިހިނގާ ޑިސެމްބަރު މަހުގެ 17 ވަނަ ދުވަހު އެ އިދާރާއިން ނިންމިއިރު، މި އިންތިހާބާ ބެހޭ ކަންތައްތަކެއް އޮޅުންފިލުވަން ކޮމިޝަނާ އޮފް ސްޕޯޓްސް، މުހައްމަދު ތޮލާލް ވަނީ އެ އިދާރާއަށް ސިޓީއެއް ވެސް ފޮނުވައިފައެވެ. ކޮމިޝަނަރު ފޮނުވާފައިވާ ސިޓީގައި، އިންތިހާބާ ގުޅޭގޮތުން ނިންމި ނިންމުމުގެ ތަފްސީލާއި އެފްއޭއެމްގައި މި ވަގުތު އޮތް ހިންގާ ކޮމިޓީގެ ބާކީ އޮތް މުއްދަތު ހަމަވާން ގިނަ ދުވަސްތަކެއް އޮއްވައި އަވަހަށް އިންތިހާބެއް ބާއްވަން އެފްއޭއެމް ހިންގާ ކޮމިޓީން ނިންމި ސަބަބާއި، އިންތިހާބު އަވަހަށް ބާއްވަން ނިންމި ހިންގާ ކޮމިޓީގެ ބައްދަލުވުމުގެ އެޖެންޑާއާއި ޔައުމިއްޔާ އަދި އެ ބައްދަލުވުމުގެ ހާޒިރީގެ އިތުރުން އެފްއޭއެމްގެ ދާއިމީ މެމްބަރުންގެ ލިސްޓު ސާފުކޮށްދިނުމަށް އެދިފައިވެއެވެ.

މީގެ އިތުރުން އެފްއޭއެމްގެ ރައީސް ބައްސާމް އަދީލް ޖަލީލްގެ އެކްސްކޯގެ އިތުރު ތިން މެންބަރަކު އިސްތިއުފާ ދިނުމުން، އެކްސްކޯގެ ގާނޫނީ އަދަދު ހަމަ ނުވާތީ މިހާރުގެ ރައީސް ބައްސާމްގެ މަގާމުވެސް ވަނީ މިދިޔަ އަންގާރަ ދުވަހު ގެއްލިފައެވެ.

ކޮމެންޓް
އިތުރު އާޓިކަލް
03 Apr 2025
މޯލްޑިްވްސް ޕޮލިސް ސަރވިސް
އިނގިލި ބުރިކޮށްލަން އުޅުނު މީހަކު އެހެން މައްސަލައެއްގައި ހައްޔަރަށް
ހުޅުމާލޭގައި މީހަކު ރަހީނު ކުރުމަށް ފަހު އޭނާގެ އިނގިލި ބުރިކޮށްލަން އުޅުނު މައްސަލައިގައި ހައްޔަރު ކުރި މީހުންގެ ތެރޭގައި ހިމެނޭ މީހަކު އަނެއްކާ ވެސް ހައްޔަރުކޮށްފިއެވެ.
03 Apr 2025
ވެލާނާ އިންޓަނޭޝަނަލް އެއާޕޯޓް
އެއާރޕޯޓު ބާރުބޮޑުވާނެތީ އެކަމަށް ސަމާލުވުމަށް އަންގައިފި
ހުކުރު ދުވަހުގެ މެންދުރުފަހު ޢުމްރާއިން މީހުން އެނބުރި އަންނާނެތީ، ވެލާނާ އެއަރޕޯޓު ބާރުބޮޑުވާނެ ކަމަށް ލަފާކޮށް، ފުރަންދާ ފަރާތްތަކުން ދުރާލާ އެއަރޕޯޓަށް ދިއުމަށް އިލްތިމާސްކޮށްފިއެވެ.
03 Apr 2025
ސްޓެލްކޯ
ބިލް ބޮޑުވީ ހޫނު ގަދަވެ ބޭނުންކުރިވަރު އިތުރުވުމުން: ސްޓެލްކޯ
ކަރަންޓުން ދިހަ އިންސައްތައިގެ ޓިސްކައުންޓެއް ދީފައިވީނަމަވެސް، ބިލް ބޮޑުވީ ހޫނު މޫސުމާ ދިމާވެ، ކަރަން ބޭނުންކުރެވޭ މިންވަރު އިތުރުވުމުން ކަމަށް ސްޓެލްކޯ އިން ބުނެފިއެވެ.
02 Apr 2025
ޚަބަރު
ހޮޅުދޫ ބޯޓުގައި ރޯވެ އެބޯޓުގައި ހުރި ޒުވާނަކު ގެއްލިއްޖެ
އެމްއެންޑީއެފުން ވިދާޅުވީ، ގެއްލިގެން ހޯދަމުން ދަނީ، ލ.މާވަށަށް ނިސްބަތްވާ 25 އަހަރުގެ އަލީ މުޝްފިގް މުހައްމަދު ކަމަށެވެ. އޭނާގެ އިތުރުން އެބޯޓުން ދަތުރު ކުރި އެހެން މީހުން ވަނީ، ސަލާމަތް ވެފައެވެ. އޭގެ ތެރެއިން ދެމީހަކަށް، ތ. ކަނޑޫދޫ ޞިއްޙީ މަރުކަޒުގައި ފަރުވާދެމުން އަންނަ ކަމުގައިވެސް އެމްއެންޑީއެފުން ވިދާޅުވިއެވެ.