ވޮލީބޯލް އެސޯސިއޭޝަން ކަޕްގެ ފިރިހެން ޑިވިޝަންގެ ޗެމްޕިއަންކަން، މުބާރާތުގައި އަލަށް ވާދަކުރި ސިޓީ ސްޕޯޓްސް ކްލަބުން ހޯދައިފިއެވެ. ތ އަތޮޅު ހިރިލަންދޫގެ ގިނަ ކުޅުންތެރިންތަކެއް ހިމެނޭ މި ޓީމުން މުބާރާތް ކާމިޔާބުކުރީ އަންގާރަ ދުވަހުގެރޭ ކްލަބް ވެމްކޯއާ ދެކޮޅަށް ކުޅުނު ފައިނަލް މެޗު ސީދާ ތިން ސެޓުން ކާމިޔާބުކޮށްގެނެވެ.

ދެ ސެމީފައިނަލް ކުޅުމަށްފަހު އުނދަގުލުން ފައިނަލަށް ދަތުރުކުރި ވެމްކޯއަށް މެޗުގެ ސެޓުތައް ގެއްލުނީ 28-26، 25-17 އަދި 25-22 އިންނެވެ.

މީޑިއާތަކުގައި ރިޕޯޓުކޮށްފައިވާ ގޮތުން، ވެމްކޯއަށް ފައިނަލް މެޗުގައި ރަގަޅު ކުޅުމެއް ނުދެއްކޭކަމަށް، ވެމްކޯގެ ކޯޗު ނިޒާރު އިބްރާހިމް ބުނެފައިވެއެވެ. އަދި ގައުމީ ޓީމުގެ ގިނަ ކުޅުންތެރިންތަކަކާއި ބްރެޒިލްގެ ދެ ކުޅުންތެރިން ހިމެނޭ ވެމްކޯޓީމަށް ފައިނަލް މެޗުގައި އެކަށީގެންވާ މިންވަރަށް މަސައްކަތް ނުކުރެވޭކަމަށް ވެސް ނިޒާރު ބުނެފައިވެއެވެ.

ހުނަރުގެ ގޮތުން މޮޅު ވެމްކޯ ޓީމު ބަލިކުރުމަށް ސިޓީ ސްޕޯޓްސް ކްލަބުގެ ދެ ބިދޭސީ ކުޅުންތެރިން މޮޅު ކުޅުމެއްދައްކާފައިވެއެވެ.

ފިރިހެން ޑިވިޝަނުގެ ޑްރީމް ޓީމުގައި ހިމެނުނީ، ވެމްކޯގެ އަލީ ހުޒާމް (ހުޒަންޓެ)، ހުސެން ޔޫސުފް އަދި އަހްމަދު ނަބީލްއެވެ. އަދި މި ޓީމުގައި ސިޓީ ސްޕޯޓްސް ކްލަބްގެ، އަހުމަދު ފާޒިލް، އަލީ ނިމާލްގެ އިތުރުން، އާބަންކޯގެ އިސްމާއިލް ސާޖިދު (ކުޑަ ކާއްޓޭ) އަދި އާދަމް ފައިރޫޒް ހިމެނުނެވެ.

މުބާރާތުގެ އެންމެ މޮޅު ކޯޗަކަށް ހޮވުނީ ސިޓީ ސްޕޯޓްސް ކްލަބްގެ ކޯޗު މުހައްމަދު ޝަރަފްއެވެ. އަދި އެންމެ މޮޅު ކުޅުންތެރިއަކީ އެ ޓީމުގެ ފާޒިލް އެވެ. މުބާރާތުގެ އެންމެ މޮޅު ބިދޭސީ ކުޅުންތެރިއަކަށް ހޮވިފައިވަނީ ސިޓީ ސްޕޯޓްސް ކްލަބްގެ ބިދޭސީ ކުޅުންތެރިޔާ ނޫރްމުހައްމަދެވެ.