ތަފާތު ސަބަބުތަކާއި ހުރެ އެތައް ފަހަރެއްގެ މަތުން ފަސްކުރަންޖެހުނު ދެވަނަ ޑިވިޝަން ފުޓުބޯޅަ މުބާރާތް އިއްޔެ ފަށައިފިއެވެ.

މުބާރާތުގެ ފުރަތަމަ މެޗުގައި ބައްދަލުކޮށްފައިވަނީ މިދިޔަ އަހަރުގެ ތިންވަނަ ޑިވިޝަންގެ ރަނަރަޕް ޓީމުގެ ގޮތުގައި ދެވަނަ ޑިވިޝަނަށް ޕްރޮމޯޓުވި މަސްއޮޑި ސްޕޯޓްސް ކްލަބާއި މަހިބަދޫ ސްޕޯޓްސް ކްލަބެވެ. މި މެޗު ފަސޭހަކަމާއެކު 4-0 އިން ކާމިޔާބުކުރީ މަސްއޮޑިއެވެ.

މަސްއޮޑީގެ ހުދު ޖާޒީގައި ގައުމީ ޓީމުގެ މިޑްފީލްޑަރު އިބްރާހިމް ވަހީދު ހަސަން (އިއްބެ) ވެސް ވަނީ އިއްޔެ ފެނިގެންގޮސްފައެވެ. މިއީ ކްލަބް ފުޓުބޯޅައާ އަހަރަކަށް ވުރެން ގިނަ ދުވަހު ދުރުގައި ހުރުމަށްފަހު، އޭނާ ފެނިގެންދިޔަ ފުރަތަމަ މެޗެވެ. މި މެޗުގައި މަސްއޮޑީގެ ފުރަތަމަ ގޯލު ކާމިޔާބުކޮށްދިނީ ވެސް އިއްބެއެވެ. މިއީ މިދިޔަ ސީޒަނުގެ ފަހު މެޗުގައި އީގަލްސްއާ ދެކޮޅަށް މާޒިޔާ ކުޅުނު މެޗުގައި ޖެހި ގޯލަށްފަހު، އޭނާ ކްލަބް ފުޓުބޯޅައިގައި ކާމިޔާބުކުރި ފުރަތަމަ ގޯލެވެ.

އިއްބެއަށް މި ސީޒަނުގައި ފުރަތަމަ ޑިވިޝަން ކުޅެވޭގޮތް ނުވީ، އޭނާ ވެލެންސިއާއަށް ސޮއިކުރި ނަމަވެސް، ފީފާގެ ސަސްޕެންޝަނާހެދި އޭނާ ޓީމުގައި ރެޖިސްޓްރީ ނުކުރެވުމުންނެވެ. އެއާއެކު އިއްބެ ނިންމީ ސެކަންޑް ޑިވިޝަން މުބާރާތުގައި ވާދަކުރުމަށެވެ.

މުބާރާތުގައި މިއަދު ހަވީރު ކުޅޭ މެޗުގައި ބައްދަލުކުރާނީ ގުރޫޕް ބީ ގައި ހިމެނޭ ބީޖީ ސްޕޯޓްސް ކްލަބާއި ޓެންޓް ސްޕޯޓްސް ކްލަބެވެ.

މުބާރާތުގައި މިއަހަރު 15 ޓީމު ވާދަކުރާއިރު، ޓީމުތައް ބަހާލާފައިވަނީ 3 ގްރޫޕަކަށެވެ.

ދެވަނަ ޑިވިޝަންގެ ގުރޫޕްތައް:

• ގުރޫޕް އޭ: މަސްއޮޑި ސްޕޯޓްސް ކްލަބް، މަހިބަދޫ ސްޕޯޓްސް ކްލަބް، ޖޭޖޭ ސްޕޯޓްސް ކްލަބް، ކުޑަހެންވޭރު ޔުނައިޓެޑް، އެލްޓީ ސްޕޯޓްސް ކްލަބް

• ގުރޫޕް ބީ: ބީޖީ ސްޕޯޓްސް ކްލަބް، ޓެންޓް ސްޕޯޓްސް ކްލަބް، ދަ ގްރާންޑޭ ސްޕޯޓްސް ކްލަބް، ނިއު ރޭޑިއަންޓް ސްޕޯޓްސް ކްލަބް، ކްލަބް ޓީނޭޖް

• ގުރޫޕް ސީ: ކްލަބް ޕީކޭ، ވިކްޓަރީ ސްޕޯޓްސް ކްލަބް، ލޮރެންޒޯ ސްޕޯޓްސް ކްލަބް، ބިސްބުރު ސްޕޯޓްސް، ލެގޫންސް ސްޕޯޓްސް ކްލަބް