ފައިލޭރިއާގެ ކޭސްތަކެއް ހުޅުމާލެއިންވެސް ފެނި، އާއްމުން ކަންބޮޑުވެފައި ވަނިކޮށް، ހުޅުމާލޭގައި މަދިރި މަދުކުރުމަށް އާބަންކޯއިން ފޮގްކުރަން ފަށައިފިއެވެ.

އާބަންކޯއިން ބުނީ، ފައިލޭރިއާއިންރައްކާ ކެމްޕެއިންގެ ދަށުން ހުޅުމާލެ ފޮގް ކުރުމުގެ މަސައްކަތް އަރބަންކޯއިން މިއަދު ފަށާފައިވާ ކަމަށެވެ.

ހުޅުމާލެ ފޭސް-1 އާއި ފޭސް-2 އަކީ، ކޮންސްޓްރަކްޝަން ސައިޓްތައް ގިނަ އަދި ގަސްތައް ގިނަ ރަށެއްކަމަށް ވާތީ، ހުޅުމާލޭގައި ދިރިއުޅޭ އާއްމުންނަށް މަދިރީގެ އުނދަގޫތައް ބޮޑުވެފައެވެ. އަދި ހުޅުމާލޭގައި މަސައްކަތް ހުއްޓާލާފައިވާ ކޮންސްޓްރަކްޝަން ސައިޓްތަކުގައި މަދިރިއުފެދި އާލާވާތީ އެކަމުގެ އުނދަގޫވެސް އާއްމުންނަށް ވަރަށް ބޮޑުވެފައި ވެއެވެ.

ހުޅުމާލޭގައި މަދިރި މަދުކުރުމަށް އާއްމު ސަރަހައްދުތައް ފޮގު ކުރުމުގެ މަސައްކަތް އާބަންކޯއިން ފަށާފައި ވާއިރު، އެކަން ކުރިއަށް ގެންދިއުމަށް ހަމަޖައްސާފައި ވަނީ ކިހާ ދުވަހަަކަށް ކަމެއް އާބަންކޯއިން ހާމައެއް ނުކުރެއެވެ.