ހުޅުމާލެ ފޭސް 2 ގައި ބަންދުކޮށްފައިވާ ސަރަހައްދުތަކަށް ވަނުމަކީ މަނާކަމެއްކަން އާބަންކޯއިން އަނެއްކާވެސް އާއްމުންނަށް ހަނދާންކޮށްދީފިއެވެ.

ހުޅުމާލެ ފޭސް 2ގެ އުތުރުފަޅިއާ ހުޅަނގު އުތުރުފަޅި އާއްމުންނަށް ބަންދުކޮށްފައި އޮތް ނަމަވެސް ފަހުން އެ ސަރަހައްދުތަކަށް އާއްމުން ވަނުން އިތުރުވެފައިވެއެވެ. އެކަމާއި ގުޅޭ ގޮތުން އާބަންކޯއިން މިއަދު ނެރުނު ބަޔާނުގައި ބުނީ، މިދުވަސްވަރަކީ މަދިރީގެ ޒަރިއްޔާއިން ފެތުރޭ ބަލިތައްގިނަވެ ހުޅުމާލޭގައިވެސް އާދަޔާ ހިލާފަށް މަދިރި ގިނަވެފައިވާ ދުވަސްވަރެއްކަމުން، ސިއްހީ ދާއިރާގެ ހިދުމަތްތެރިދަނީ ތަކުރާރުކޮށް އެކަމަށް ހާއްސަ ސަމާލުކަމެއް ދިނުމަށް އިލްތިމާސް ކުރަމުންނެވެ. އެހެންކަމުން ހުޅުމާލޭގެ ފޭސް 2 ގައި ބަންދުކޮށްފައިވާ ސަރަހައްދަކީ ކޮންސްޓްރަކްޝަން މަސައްކަތުގެ އިތުރުން ހުސްބިންތަކުގައި ބޮޑެތި ގަސްތަކާއި ވިނަހުރި ސަރަހައްދަކަށްވާތީ، އެސަރަހައްދުގައި މަސައްކަތްކުރާ ފަރާތްތަކުން އެކަމަށް އިތުރަށް ސަމާލުކަން ދިނުމަށްވެސް އިލްތިމާސްކުރާ ކަމަށެވެ،

ފޭސް 2 ގައި ބަންދުކޮށްފައިވާ ސަރަހައްދަކީ އާންމުންނަށް ހުޅުވާލެވިފައިވާ ސަރަހައްދަކަށްނުވިނަމަވެސް މަދުންނަމަވެސް އާންމުން މިސަރަހައްދަށް ވަންނަކަން މިކޯޕަރޭޝަނަށްވަނީ ފާހަގަކުރެވިފައިވާކަމަށާއި، ވީމާ ހުއްދައެއްނެތި، ޒަރޫރީ އެއްވެސްބޭނުމަކާއި ނުލައި މިސަރަހައްދަށް ނުވަނުމަށް އަންގާ އިއުލާންކުރާކަމުގައިވެސް އެޗްޑީސީން ވަނީ ބުނެފައެވެ.

Advertisement