ގއ. ވިލިގިލީ ފަހިމަގު-303 ދޯނީގެ ބިދޭސީ ފަޅުވެރިއަކު މިރޭ ނިޔާވެއްޖެއެވެ.

ދާންދޫ ކައުންސިލްގެ ރައީސް މުޙައްމަދު އާސިފް ވިދާޅުވީ، ދާންދޫ ޞިއްޙީމަރުކަޒަށް ގެނައިރުވެސް ބިދޭސީ މީހާ ނިޔާވެފައިވާ ކަމުގައި އޭނާގެ ހަށިގަނޑު ބެއްލެވި ޑޮކްޓަރުން ވިދާޅުވެފައިވާ ކަމަށެވެ.

އާސިފް ވިދާޅުވީ، ނިޔާވި މީހާއަކީ، މުހައްމަދު ސައްޔިދުލްއިސްލާމް (35އ) ކަމަށެވެ. އޭނާއަކީ ބަނގުލަދޭޝްގެ ރައްޔިތެކެވެ.

ފަހިމަގު-303 ދޯނީގެ ފަޅުވެރިންނާއި ހަވާލާދީ އާސިފް ވިދާޅުވީ، ބިދޭސީ މީހާގެ ހާލު ދެރަވީ ޑައިވިނަށް ފައިބައިގެން އުޅެނިކޮށް އޭނާއަށް ޞިއްޙީ މައްސަލަތަކެއް ދިމާވީއެވެ.

ހާދިސާއާއި ގުޅިގެން ފުލުހުން ބަލަންޖެހޭ ކަންކަން މިހާރު ބަލަމުންދާ ކަމަށާއި، ނިޔާވި މީހާގެ ހަށިގަނޑު އޮތީ، ދާންދޫ ސިއްޙީމަރުކަޒުގައި ކަމަށް އާސިފް ވިދާޅުވިއެވެ.

އެންހިފުމަށް ވައިފުޅި އަޅައިގެން ފީނާމީހުންނަށް ދިމާވާ މައްސަލަތަކުގައި މީގެ ކުރިންވެސް ބައެއް މީހުން ނިޔާވެފައިވެއެވެ.