މިރޭ ދަންވަރު 1:00 އިން ފެށިގެން ފަތިހު 3:00އަށް ސިނަމާލެ ބުރިޖުގެ، މާލެއިން ހުޅުމާލެއަށް ދަތުރުކުރާ ލޭނު (އުތުރު ލޭނު) ބަންދުވާނެ ކަމުގައި ފުލުހުން ބުނެފިއެވެ. 

ފުލުހުން ބުނީ، ބުރިޖުގެ އުތުރުފަޅީގެ ދެލޭން ބަންދުކޮށްފައި އޮންނަ ވަގުތުގައި، ދެކޮޅަށް ދުއްވޭގޮތަށް ބުރިޖުގެ ދެކުނު ފަރާތު ދެލޭން ހުޅުވާލާނެ ކަމަށެވެ. އެއީ މިހާރު ހުޅުމާލޭ ކޮޅުން މާލެއަށް ދަތުރުކުރަން އޮންނަ ފަޅިއެވެ. އެހެންކަމުން އެ ވަގުތު ބްރިޖުން ދަތުރުކުރައްވާއިރު، އެ ސަރަހައްދުގައި ހަރަކާތްތެރިވާ ފުލުހުންގެ އިރުޝާދުތަކާ އެއްގޮތަކަށް ބުރިޖުން ދަތުރުކުރާ ފަރާތްތަކުން އަމަލުކުރުމަށް ފުލުހުން ވަނީ އެދިފައެވެ. 

ސިނަމާލެ ބުރިޖުގެ އުތުރުފަޅި ބަންދުކުރަނީ ކޮންކަމަކާއި ގުޅިގެން ކަމެއް ފުލުހުންނެއް ނުބުނެއެވެ. އެކަމަކު އެނގިފައިވާ ގޮތުގައި ބުރިޖުގެ އެލޭނު ބަންދުކުރަނީ، ސިނަމާލެ ބުރިޖުގެ މޮނިއުމެންޓްގައި ޖަހާފައިވާ ނަމުގެ ބައެއް އަކުރުތައް ވެއްޓިފައިވާތީ އެކަން ރަނގަޅު ކުރުމަށެވެ. ޗައިނާ ދިވެހިރާއްޖޭގެ ގުޅުން ރަމްޒުކޮށްދޭ ބުރިޖަށް ދީފައިވާ ނަަމަކީ، ޗައިނާ މޯލްޑިވްސް ފްރެންޑްޝިޕް ބްރިޖެވެ.