މިސަރުކާރުން ހިންގާނެ އެންމެ ބޮޑު އެއް މަޝްރޫއަކީ ސިކުނޑިތައް ބިނާކުރުން ކަމުގައި ރައީސުލްޖުމްހޫރިއްޔާ، ޑރ. މުޙައްމަދު މުޢިއްޒު ވިދާޅުވެއްޖެއެވެ.

އެމަނިކުފާނު މިހެން ވިދާޅުވީ، ހުޅުމާލެ ދެވަނަ ފިޔަވަހީގައި އިމާރާތްކުރާ އައު ސްކޫލުގެ ބިންގާއެޅުމުގެ ރަސްމިއްޔާތުގައި ވާހަކަފުޅު ދައްކަވަމުންނެވެ.

ރައީސުލްޖުމްހޫރިއްޔާ ވިދާޅުވީ، ސިކުނޑިތައް ބިނާކުރުމަކީ މިސަރުކާރުގެ އެންމެބޮޑު އެއް މަޝްރޫޢު ކަމަށާއި، ކިތަންމެ އުސްކޮށްވެސް އިމާރާތް ހެދިދާނެކަމަށާއި އެހެންނަމަވެސް އެ އިމާރާތް އެހެދޭ އުސްމިނާ އެއްވަރަށް ސިކުނޑިތައް ތަރައްޤީ ނުކުރެވޭނަމަ ޤައުމަކުން ކުރާނެ މާބޮޑު ފައިދާއެއް ނޯންނާނެ ކަމަށެވެ.

ރައީސުލްޖުމްހޫރިއްޔާ ޑރ. މުހައްމަދު މުޢިއްޒުގެ ސަރުކާރުގައި، ތަޢުލީމަށާއި މީހުން ބިނާކުރުމަށް ޚާއްޞަ އިސްކަމެއް ދިނުމަކީ އެމަނިކުފާނުގެ ރިޔާސީ ވަޢުދުތަކުގެ ތެރޭގައި ހިމެނޭ ކަމެކެވެ. މިގޮތުން އެމަނިކުފާނުގެ ސަރުކާރުގެ ހަފްތާ 14 ގެ ލަނޑުދަނޑިތަކުގެ ތެރޭގައި ތަޢުލީމީ ދާއިރާއިންނާއި މީހުން ބިނާކުރުމުގެ ދާއިރާއިން ޙާސިލްކުރަން ބޭނުންވާ ކަންކަން ހިމަނުއްވާފައިވެއެވެ.