އެސްއީޒެޑްގެ ފުރަތަމަ ޕްރޮޕޯސަލް ސަރުކާރަށް ލިބިފައިވާ ކަމުގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.

އެމަނިކުފާނު މިހެން ވިދާޅުވީ، ރޭ ހޮޓެލް ޖެންގައި ކުރިއަށްދިޔަ "އެމް.އެން.އޭ.ސީ.އައި ބިލްޑަރ އެވޯޑްސް 2023" ޙަފުލާ ޝަރަފްވެރިކޮށްދެއްވައި ދެއްކެވި ވާހަކަފުޅުގައެވެ.

ރައީސުލްޖުމްހޫރިއްޔާ ވިދާޅުވީ، އެސް.އީ.ޒެޑް. ޤާނޫނުގެ ދަށުން، އެސް.އީ.ޒެޑް. އިންވެސްޓްމަންޓްތަކަށް މިހާރު އޮތީ ހުޅުވާލާފައި ކަމަށެވެ. މިގޮތުން އެސްއީޒެޑްގައި އިންވެސްޓްކުރެވޭނެ އެންމެ ކުޑައަގަކަށް 100 މިލިއަން ޑޮލަރު ކަނޑައެޅީ މިސަރުކާރުންނެވެ. 

އެސްއީޒެޑްގައިން އިންވެސްޓް ކުރުމުގެ ފުރަތަމަ ޕްރޮޕޯސަލް ލިބިފައިވާކަން އިޢުލާނުކުރައްވައި ރައީސުލްޖުމްހޫރިއްޔާ ވިދާޅުވީ، ފުރަތަމަ ޕްރޮޕޯސަލް އަކީ އިއާދަކުރަނިވި ހަކަތައިގެ މަޝްރޫއެއް ހިންގުމަށް ލިބިފައިވާ ޕްރޮޕޯސަލްއެއް ކަމަށެވެ.

ރައީސުލްޖުމްހޫރިއްޔާ ވަނީ އެޕްރޮޕޯސަލް އާއިއެކު ރާއްޖޭގައި ފެށިގެންދާ އިއާދަކުރަނިވި ހަކަތައިގެ މަޝްރޫޢުވެގެންދާނީ، ކޮޕް-28ގައި ކަނޑައެޅިފައިވާ މަޤުޞަދުތައް ޙާސިލްކުރުމަށް ކޮޕްގައި ހިމެނޭ ޤައުމަކުން ފުރަތަމަ ފަށާ މަސައްކަތަށް ވެގެންދާނެކަން ފާހަގަކުރައްވާފައެވެ.

އެސްއީޒެޑްގައި އިންވެސްޓް ކުރެވޭނެ އެންމެ ކުޑަ މިންވަރު 100 މިލިއަން ރުފިޔާއަށް ދަށްކޮށް، ރައީސް ޑރ. މުއިއްޒު ޤަރާރެއް ނެރުއްވީ، މިޑިސެމްބަރު މަހުގެ 17 ވަނަ ދުވަހުގައެވެ. މިގޮތުން އެސްއީޒެޑްގައި 9 ދާއިރާއަކުން އިންވެސްޓް ކުރުމަށް ވަނީ ނިންމަވާފައެވެ. އޭގެ ތެރޭގައި ހިމެނެނީ، އެކްސްޕޯޓަށް އިސްކަން ދީގެން ހިންގާ މެނުފެކްޗަރިންގެ މަސައްކަތްތަކާއި، ޓްރާންސްޝިޕްމެންޓް ޕޯޓާއި އިންޓަނޭޝަނަލް ލޮޖިސްޓިކްސް، ޕޯޓު، އެއާޕޯޓު، ބަލްކް ބްރޭކިން، ބަންކަރިން އާއި ޑޮކިން ސާވިސަސް އާއި، ޔުނިވާސިޓީ، ޓާޝާރީ ހޮސްޕިޓަލް، ސްޕެޝަލިޓީ ހޮސްޕިޓަލް، ދުނިޔޭގެ ފެންވަރުގެ ރިސާޗް އެންޑް ޑިވެލޮޕްމެންޓް ފެސިލިޓީ ތަރައްޤީކުރުމާއި، ދުނިޔޭގެ ފެންވަރުގެ އިންފޮމޭޝަން އެންޑް ކޮމިއުނިކޭޝަން ޓެކްނޮލޮޖީ ޤާއިމްކުރުމެވެ. އޭގެ އިތުރުން، އިންޓަނޭޝަނަލް ފައިނޭންސް ސާވިސަސް އާއި، އިޔާދަ ކުރަނިވި ހަކަތަ އާއި ރާއްޖޭގައި ނެތް ޓެކްނޮލޮޖީއެއް ރާއްޖެ އަށް އާންމު ކުރުމަށް ހިންގޭ މަސައްކަތާއި، ފުޑް ސެކިއުރިޓީގެ ދާއިރާގެ އިތުރުން، ގޭސް އެކްސްޕޮލޮރޭޝަންގެ މަސައްކަތްތައް ހިމެނެއެވެ.

ރައްޔިތުންގެ މަޖިލީހުން، ސްޕެޝަލް އިކޮނޮމިކް ޒޯން (އެސްއީޒެޑް)ގެ ޤާނޫނު ފާސްކުރީ 2014 ވަނަ އަހަރުގައެވެ.