މާލޭ ސޯޝަލް ސެންޓަރުގެ އިންޑޯ ކޯޓުގައި މިހާރު ކުރިޔަށްދާ ވޮލީބޯލް އެސޯސިއޭޝަން ކަޕްގެ ފިރިހެން ޑިވިޝަންގެ ފައިނަލުގެ ދެވަނަ ޖާގަ ވެމްކޯއިން ހޯދައިފިއެވެ. ވެމްކޯއިން ފައިނަލަށް ދަތުރުކުރީ، ސެމީފައިނަލްގެ ތިން ވަނަ މެޗުގައި ކްލަބް އާބަންކޯ 3-2 ސެޓުން ބަލިކޮށްގެންނެވެ.

ޕޫލް-1 ގެ ދެވަނަ ޓީމުގެ ގޮތުގައި ސެމީ ފައިނަލުން ޖާގަ ލިބުމުން، ވެމްކޯއަށް ކުރަން ޖެހުނު މަސައްކަތް އިތުރުވިއެވެ. އެއީ ޕޫލް-1 އާއި ޕޫލް-2 އިން ދެ ވަނައަށް ދިޔަ ދެ ޓީމު ސެމީފައިނަލްގެ ފުރަތަމަ މެޗުގައި ވާދަކޮށް، އެ މެޗު ކާމިޔާބުކުރާ ޓީމެއް ފައިނަލަށް ދާން އޮތީ ސެމީފައިނަލް ދެވަނަ މެޗުން ބަލިވާ ޓީމެއް ވެސް ބަލިކޮށްގެންކަމުންނެވެ. އަދި އާބަންކޯގެ މައްޗަށް ހޯދި މޮޅާ އެކީ، ސެމީފައިނަލް ދެ މެޗު ކުޅެ ވެމްކޯއިން މިވަނީ ފައިނަލަށް ދިއުމުގެ ކުރިން އިތުރު ތަޖުރިބާއެއް ހޯދާފައެވެ.

ވެމްކޯއާ ދެކޮޅަށް މި މެޗުގައި ކުޅުނު އާބަންކޯ ސެމީފައިނަލް ތިންވަނަ މެޗު ކުޅެން ޖެހުނީ، ސެމީ ފައިނަލްގެ ދެ ވަނަ މެޗު، ސިޓީ ސްޕޯޓްސް ކްލަބާއި ވާދަކޮށް 3-1 ސެޓުން ގެއްލުމުންނެވެ. މި ދެ ޓީމު ވެސް ސެމީފައިނަލުން ޖާގަ ހޯދީ ގްރޫޕްގެ އެއްވަނަ ޓީމުގެ ގޮތުގައެވެ.

ރޭ ކުޅުނު ސެމީފައިނަލްގެ ތިން ވަނަ މެޗުގެ ކޮންމެ ސެޓެއްގައި ވެސް ނޭވާ ހިފަހައްޓާލަން ޖެހުނު ގިނަ ވަގުތުތަކެއް ދިޔައެވެ. މެޗުގެ ފުރަތަމަ ސެޓު 25-21 އިން ގެންދިޔައީ ވެމްކޯއެވެ. ނަމަވެސް ދެވަނަ ސެޓުގައި އާބަންކޯއިން ކުޅުން އިތުރަށް ރަގަޅުކޮށް، 25-19 އިން ސެޓު ގެންދިޔައެވެ. ތިން ވަނަ ސެޓު ގެންދިޔައީ އަނެއްކާވެސް ވެމްކޯއިންނެވެ. އެއީ 27 ޕޮއިންޓު 25 ޕޮއިންޓުންނެވެ. ހަތަރު ވަނަ ސެޓާއެކީ ވެމްކޯއަށް މެޗު ނިންމުމަށް ފުރުސަތުނުދީ، އާބަންކޯއިން އެ ސެޓު 25-21 އިން ކާމިޔާބުކޮށް، އުއްމީދު އައުކުރިއެވެ. ވެމްކޯއިން މެޗު ކާމިޔާބުކުރީ ، ފަހު ސެޓު 15-12 އިން ކާމިޔާބުކޮށް 3-2 ސެޓުންނެވެ.

މި ދެ ޓީމުންވަނީ މުބާރާތުގެ ފައިނަލް ބުރުގެ ފުރަތަމަ މެޗުގައިވެސް ވާދަކޮށްފައެވެ. އެ މެޗުވެސް 3-2 ސެޓުން ކާމިޔާބުކުރީ ވެމްކޯއެވެ.

ސެމީ ފައިނަލް ތިން ވަނަ މެޗުގެ މޮޅު ކުޅުންތެރިއަކަށް ހޮވިފައިވަނީ ގައުމީ ޓީމުގެ ކެޕްޓަންކަން ވެސް ކުރިން ކޮށްފައިވާ، ވެމްކޯގެ ޖާޒީ ނަމްބަރު 12، އަލީ ހުޒާމް (ހުޒަންޓެ)އެވެ.

މި މުބާރާތުގެ ފައިނަލް މެޗު އޮންނާނީ މާދަމާރޭގެ 8:15 ގައި ސޯޝަލް ސެންޓަރުގެ އިންޑޯ ކޯޓުގައެވެ. ބައްދަލުކުރާނީ ސިޓީ ސްޕޯޓްސް ކްލަބާއި ކްލަބް ވެމްކޯއެވެ.

މި މުބާރާތުގެ އަންހެން ޑިވިޝަންގެ ފައިނަލް މިރޭ އޮންނާނެއެވެ. ބައްދަލު ކުރާނީ ޕޮލިސް ކްލަބާއި ވެމްކޯއެވެ.