މޯލްޑިވްސް ނޭޝަނަލް އެސޯސިއޭޝަން އޮފް ކޮންސްޓްރަކްޝަން އިންޑަސްޓްރީ، (މަސީ)އިން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒަށް "ބޮޑުރަސްގެފާނު ލަޤަބު"ގެ ނަމުގައި ލަޤަބެއް އަރުވައިފިއެވެ.

ރައީސުލްޖުމްހޫރިއްޔާއަށް، މިލަޤަބު އެރުވުމާއި އެވޯޑު ހަވާލުކުރެއްވުން އޮތީ، މިރޭ ބޭއްވި، މަސީގެ "އެމް.އެން.އޭ.ސީ.އައި ބިލްޑަރ އެވޯޑްސް 2023" ޙަފުލާގައެވެ. އެވޯޑު ރައީސުލްޖުމްހޫރިއްޔާއަށް ހަވާލުކޮށްދެއްވީ، ރައިސުލްޖުމްހޫރިއްޔާގެ ޕްރިންސިޕަލް އެޑްވައިޒަރ ޓު ދަ ޕްރެޒިޑެންޓް އޮން ޓްރޭޑް އެންޑް އިންވެސްޓްމަންޓްގެ މަޤާމާއި، މަސީގެ ރައީސް ކަމުގެ މަޤާމުގައި ހުންނެވި މުޙައްމަދު ޢަލީ ޖަނާޙްއެވެ.

މަސީން މިލަޤަބާއި އެވޯޑު ރައީސުލްޖުމްހޫރިއްޔާއަށް ދެއްވީ، އެމަނިކުފާނު ހައުސިންގ މިނިސްޓަރުކަމުގައި ހުންނަވައިގެން އޭރުގެ ސަރުކާރުން ހިންގެވި ޢުމުރާނީ ތަރައްޤީގެ ބޮޑެތިބިޔަ މަޝްރޫޢުތައް ފާހަގަކޮށްފައެވެ. މިގޮތުން ހައުސިންގ މިނިސްޓަރުގެ މަޤާމުގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ހުންނެވި 7 އަހަރުގެ ތެރޭގައި، ސަރުކާރުން ރާއްޖޭގައި ހިންގި ޢުމުރާނީ ތަރައްޤީގެ ބޮޑެތި މަޝްރޫޢުތަކުގެ ތެރޭގައި، ސިނަމާލެ ބުރިޖުއެޅުމާއި، ހިޔާގެ މަޝްރޫޢު ހިންގުމާއި، ދަރުމަވަންތަ ހޮސްޕިޓަލް ބިނާކުރުމާއި، މާލޭގެ މަގުތައް އަލުން ހެދުމާއި، މާލެއަށް ހިތްފަސޭހަކަން ގެނައުމުގެ ގޮތުން ޕާކުތަކާއި މައިޒާންތައް ހެދުމާއި، ސަލްޓަންޕާކު އަލުން ރަސްރަނި ބަގީޗާގެ ނަމުގައި ތަރައްޤީކުރެއްވުން ހިމެނެއެވެ.

މަސީގެ "އެމް.އެން.އޭ.ސީ.އައި ބިލްޑަރ އެވޯޑްސް 2023" ހަފްލާއަކީ، އެ ޖަމިއްޔާއިން އެވޯޑެއް ތަޢާރަފްކޮށް ބޭއްވި މިފަދަ ފުރަތަމަ ޙަފްލާއެވެ.

މި ޙަފުލާގައި ވަނީ، އިމާރާތްކުރުމުގެ މަސައްކަތުގެ ދާއިރާއިން،  ޙަޔާތީ އަރުތަކުގެ އެވޯޑް ހާސިލުކުރި ފަރާތްތަަށްވެސް އެވޯޑު ދީފައެވެ، މިއވޯޑު ލިބިވަޑައިގަތް އަމީން ގްރޫޕް އޮފް ކޮމްޕެނީސްގެ ޗެއަރމަން، ޢަބްދުﷲ މުޙައްމަދަށާއި، ހޮޓެލްސް އެންޑް ރިސޯޓްސް އިންވެސްޓްމަންޓް މޯލްޑިވްސްގެ ޗެއަރމަން މުޙައްމަދު އަލީ ޖަނާޙަށް އެވޯޑް ހަވާލުކޮށްދެއްވީ ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒެވެ.