ވަކި މަސައްކަތްތަކަކީ ހަމައެކަނި ދިވެހިންނަށް ޚާއްޞަ މަސައްކަތްތަކެއްކަމުގައި ކަނޑައެޅުވުމަށް މަސައްކަތް ފައްޓަވައި އެކަމާއި ގުޅޭ ގޮތުން ވަޒީރުންގެ މަޖިލީހުގައި މަޝްވަރާކުރައްވާފައިވާ ކަމުގައި ރައީސުލްޖުމްހޫރިއްޔާ ޑރ. މުހައްމަދު މުޢިއްޒު ވިދާޅުވެއްޖެއެވެ.

އެމަނިކުފާނު މިހެން ވިދާޅުވީ ހޮޓެލް ޖެންގައި މިރޭ ބޭއްވި "އެމް.އެން.އޭ.ސީ.އައި ބިލްޑަރ އެވޯޑްސް 2023" ޙަފުލާގައި ވާހަކަފުޅު ދައްކަވަމުންނެވެ.

ރައީސުލްޖުމްހޫރިއްޔާ ވިދާޅުވީ، ސަރުކާރުން ގަސްތުކޮށްފައި އޮތީ ވަކިދާއިރާތަކަކީ ހަމައެކަނި ދިވެހިން މަސައްކަތްކުރާ ދާއިރާތަކެއް ކަމުގައި ކަނޑައަޅައި އެދާއިރާތަކުގައި ބިދޭސީ މިހާރު މަސައްކަތްކުރަމުންދާ ދިޔުން ނިމުމަކަށް ގެނައުމަށް ކަމަށެވެ. މިގޮތުން ވަޒީރުންގެ މަޖިލީހުގެ އާދީއްތަ ދުވަހުގެ ބައްދަލުވުމުގައި އެކަމާއި ގުޅޭ ގޮތުން މަޝްވަރާތައް ކުރައްވައި ނިންމުންތަކެއް ނިންމިފައިވާ ކަމުގައި ރައީސުލްޖުމްހޫރިއްޔާ ވިދާޅުވިއެވެ.

ރައީސުލްޖުމްހޫރިއްޔާ ވިދާޅުވީ، ދިވެހިންނަށް ޚާއްޞަ ކުރުމަށް ކަނޑައެޅި މަސައްކަތްތަކުގެ ތެރޭގައި، ކޮންސްޓްރަކްޝަން އިންޑަސްޓްރީއާ ގުޅޭ ތިން ދާއިރާއެއްވެސް ހިމެނޭކަމަށެވެ.

މިގޮތުން، އެއީ ބިލްޑިންގ އިންސްޕެކްޓަރުންގެ ދާއިރާއާއި، ސައިޓް ސުޕަވައިޒަރުންގެ ދާއިރާއާއި، ސާރވޭޔަރުންގެ ދާއިރާކަމަށާއި، އެދާއިރާތަކަކީ ކުރިޔަށް އޮތްތަނުގައި ހަމައެކަނި ދިވެހިން މަސައްކަތްކުރާނެ ދާއިރާތަކަށް ވެގެންދާނެ ކަމުގައި ރައީސުލްޖުމްހޫރިއްޔާ ވިދާޅުވިއެވެ.

ރައީސުލްޖުމްހޫރިއްޔާ ވިދާޅުވީ، އެކަމުގެ ބޭނުމަކީ ދިވެހިވަންތަކަން ހުރިހާކަމެއްގެ ތެރެއަށް ގެނައުން ކަމަށެވެ. އަދި ކޮންސްޓްރަކްޝަން އިންޑަސްޓްރީއަކީ، ދެވަނައަށް އެންމެބޮޑު އިންޑަސްޓްރީއަށްވާއިރު އެފަދަ ބަދަލުތައް ގެންނަން ޖެހޭ ކަމުގައިވެސް ރައީސުލްޖުމްހޫރިއްޔާ ވިދާޅުވިއެވެ. މީގެ އިތުރުން އެމަނިކުފާނު ވިދާޅުވީ، ސަރުކާރުގެ 20 އަހަރުގެ މާސްޓަރ ޕްލޭން ތެރޭގައި، ސަރުކާރުގެ ވިސްނުމަކީ، މުޅި އިންޑަސްޓްރީއަކީވެސް ދިވެހިން އެކަނި މަސައްކަތްކުރާ އިންޑަސްޓްރީއަކަށް ހެދުންކަމަށެވެ.

ދިވެހިންނަށް ޚާއްސަ މަސައްކަތުގެ ދާއިރާތަކެއް ކަނޑައެޅުއްވުމަށް ސަރުކާރުން މަސައްކަތްކުރައްވަމުންދާކަން ރައީސުލްޖުމްހޫރިއްޔާ ހާމަކުރެއްވިއިރު، ރައީސް ޔާމީނުގެ ސަރުކާރުގައިވެސް އެގޮތަށް މަސައްކަތް ކުރެއްވިއެވެ. އެގޮތުން ކޭޝިއަރުންގެ ގޮތުގައި ވިޔަފާރިތަކުން ދިވެހިން ނޫން ބަޔަކު ގެންގުޅުން މަނާވެސް ކުރިއެވެ. އެހެން ނަމަވެސް އެކަމުގެ މަޤުޞަދު ޙާޞިލްނުވެ ކުރިއެކޭ އެއްގޮތަށް މިހާރު ކުދިވިޔަފާރިތަކުގެ ކައުންޓަރުތަކުގައި ތިބެނީ ބިދޭސީންނެވެ.