މިސަރުކާރުން ހިންގުމަށް ހަމަޖައްސާފައިވާ ބޯހިޔާވަހިކަމުގެ އެންމެ ބޮޑު މަޝްރޫއަށް ބޭނުންވާ ބިންހިއްކުމުގެ  މަސައްކަތުގައި މިހާތަނަށް 10 ހެކްޓަރުގެ ބިން ހިއްކާފައިވާ ކަމުގައި ސަރުކާރުން ހާމަކޮށްފިއެވެ.

ސަރުކާރުގެ ސިޔާސީ މަޤާމުތަކުގައި ތިބި ފަރާތްތަކުން މިއަދު ވަނީ، ފުށިދިއްގަރުފަޅުގައި ބިންހިއްކަމުންދާ ސަރަހައްދަށް ޒިޔާރަތްކޮށް ސަރުކާރުގެ އެމަޝްރޫޢު ހިންގަމުންދާ ގޮތާއި ގުޅޭ މަޢުލޫމާތުތައް ސޯޝަލްމީޑިއާގައި ހިއްސާކޮށްފައެވެ. 

ފުށިދިއްގަރުފަޅު ސަރުކާރުން ތަރައްޤީކުރުމަށް ނިންމާފައި ވަނީ، ރަސްމާލޭގެ ނަމުގައެވެ. ބިންހިއްކުމުގެ ފުރަތަމަ ފިޔަވަހީގެ ދަށުން 29 ހެކްޓަރުގެ ބިން ހިއްކާއިރު، މިމަޝްރޫޢުގެ ދަށުން ޖުމުލަ، 1153 ހެކްޓަރުގެ ބިން ހިއްކާނެއެވެ. އޭގެ ތެރެއިން 60 ހެކްޓަރުގެ ބިންދޭނީ ބިން ހިއްކާ ކުންފުންޏަށެވެ. 

ރަސްމާލެ މަޝްރޫޢުގެ މުޅިމަޝްރޫޢަށް ބޭނުންވާ ބިން ހިއްކައި ނިމޭނީ 8 މަސްދުވަހުން ކަމުގައި ސަރުކާރުން ވަނީ ހާމަކޮށްފައެވެ. ރަސްމާލެ ބިންހިއްކުމުގެ މަޝްރޫޢުގެ ސްޕީޑް ބާރުކަމަށް ބުނެ، 7 ދުވަހުން 10 ހެކްޓަރުގެ ބިންހިއްކިފައިވާކަން ސަރުކާރަށް ތާއީދުކުރާ ފަރާތްތަކުން ފާހަގަކުރާއި އިރު، އެއީ ދުވާލަކަށް 1.4 ހެކްޓަރެވެ. އެސްޕީޑަށް ބަލާނަމަ، ހިއްކުމަށް ކަނޑައަޅާފައިވާ 1153 ހެކްޓަރުގެ ބިންހިއްކައި ނިމޭނީ، 3 އަހަރާއި ތިންމަސް ދުވަހުންނެވެ.

މާލެ ސަރަހައްދުގެ ބޯހިޔާވަހިކަމަށް އޮތް ގޮންޖެހުންތަކާއި ދަތިތައް ހައްލުކޮށްދިނުމަކީ ރައީސުލްޖުމްހޫރިއްޔާ، ޑރ. މުޙައްމަދު މުޢިއްޒުގެ ރިޔާސީ އެންމެ ބޮޑު ވަޢުދެވެ.