Advertisement
ކޯވިޑް 19ގެ ދުވަސްވަރު ޓެސްޓް ސާމްޕަލް ނެގުން --- ފައިލްފޮޓޯ
ދުނިޔޭގައި ކޯވިޑްގެ އައު ވޭރިއަންޓެއް ފެތުރެމުންދާތީ ދިވެހިން އެކަމަށް ސަމާލުވާން އެޗްޕީއޭއިން އެދިއްޖެ
ދުނިޔޭގެ އެކި ޤައުމުތަކުގެ ކޯވިޑް-19ގެ އައު ވޭރިއަންޓެއް ފެތުރެމުންދާތީ، އެކަމަށް ދިވެހިން ސަމާލުވުމަށް އެޗްޕީއޭއިން އިލްތިމާސްކޮށްފިއެވެ.
ފިނިމޫސުމާއި ދިމާކޮށް މިހާރު ދުނިޔޭގެ ޤައުމުތަކުގައި ފެތުރެމުން ދަނީ، ޖޭއެންވަންގެ ނަންދީފައިވާ ވޭރިއަންޓެކެވެ. ކައިރި އަވަށްޓެރި ޤައުމުތަކުގެ ތެރެއިން އިންޑިއާގައިވެސް ކޯވިޑް ފެތުރުން އިތުރުވެފައިވާކަމުގައި އެޤައުމުގެ ކަމާއި ބެހޭ ފަރާތްތަކުންވެސް ވަނީ ހާމަކޮށްފައެވެ.
ދުނިޔޭގައި ކޯވިޑްގެ އައު ވޭރިއަންޓެއް ފެތުރެމުން ދިޔުމާއިއެކު އާއްމުން އެކަމަށް ސަމާލުކަން ދިނުމަށް އެޗްޕީޢޭއިން އިލްތިމާސްކޮށްފައި ވަނީ، މިދުވަސްވަރަކީ ޓަރމް ބްރޭކް ޗުއްޓީއަށް ވުމާއި އެކު، ދިނަ އަދަދެއްގެ ބަޔަކު ރާއްޖެއިން ބޭރަށްވެސް ދަތުރު ކުރާނެތީއެވެ. މީގެ އިތުރުން މިބަންދުގެ ތެރޭގައި އުމުރާގެ އަޅުކަމަށްވެސް ގިނަބަޔަކު ގޮސް އެނބުރި އަންނާނެތީ، އެހެން އަހަރުތަކެކޭވެސް އެއްފަދައިން މިއަހަރުވެސް އަރިދަފުސް ރޯގާ، ވައިރަލް ހުން، އަދި ނޭވާލާ ނިޒާމަށް ޖެހޭ ގައިންގަޔަށް އަރާ ބަލިތައް އިތުރުވެގެންދާނެކަމަށް އެޗްޕީއޭއިން ވަނީ ލަފާކޮށްފައެވެ.
ބަލިން ރައްކާތެރިވުމަށް ދުރާލާ ފިޔަަވަޅުތައް އެޅުމަށް ތައްޔާރުވުމަށް އިލްތިމާސްކުރުމުގެ އިތުރުން، އެޗްޕީއޭއިން ވަނީ، މަދިރި އުފެދޭތަންތަން ނައްތާލުމަށާއި، ކާބޯތަކެތީގެ ސާފުތާހިރުކަމަށް ޚާއްޞަ ސަމާލުކަމެއް ދިނުމަށްވެސް އިލްތިމާސްކޮށްފައެވެ.
